ഷാർജയുടെ പുതിയ വാണിജ്യ ഹബ്ബായി അരാദ സെൻട്രൽ ബിസിനസ് ഡിസ്ട്രിക്ട് (സി.ബി.ഡി) വരുന്നു. മഹാമാരി എത്തിയശേഷം മേഖലയിൽ സ്ഥാപിക്കുന്ന ആദ്യ ബിസിനസ് പാർക്കാണിത്. അൽജാദയിൽ നിർമിക്കുന്ന ബിസിനസ് ഡിസ്ട്രിക്ടിൽ 4.3 ദശലക്ഷം ചതുരശ്ര അടിയിലായി 40 സ്മാർട്ട് ഓഫിസ് ബ്ലോക്കുകളുണ്ട്. എട്ട് ബ്ലോക്കുകളുടെ ആദ്യഘട്ടം 2025ൽ പൂർത്തീകരിക്കാനാണ് ലക്ഷ്യമിടുന്നത്.
ഒരേസമയം 20,000 ജീവനക്കാരെ ഉൾക്കൊള്ളാനുള്ള ശേഷിയുണ്ട് സി.ബി.ഡിക്ക്. യു.എ.ഇയുടെ വിവിധ ഭാഗങ്ങളിലുള്ള സ്ഥാപനങ്ങൾക്ക് സി.ബി.ഡിയിൽ അനായാസ നടപടിക്രമങ്ങളിലൂടെ ഓഫിസ് തുറക്കാൻ കഴിയും. അത്യാധുനിക സാങ്കേതികവിദ്യകളുടെയും നൂതനാശയങ്ങളുടെയും കേന്ദ്രമായിരിക്കും സി.ബി.ഡി. യു.എ.ഇയിലും പുറത്തുമുള്ള എല്ലാത്തരം സ്ഥാപനങ്ങളെയും ആകർഷിച്ച് ബിസിനസ് ഹബ്ബായി മാറാനുള്ള ഷാർജയുടെ വീക്ഷണമാണ് അരാദ നടപ്പാക്കുന്നതെന്ന് ചെയർമാൻ ശൈഖ് സുൽത്താൻ ബിൻ അഹ്മദ് ബിൻ സുൽത്താൻ അൽ ഖാസിമി പറഞ്ഞു. ജോലിചെയ്യാനും താമസിക്കാനും വിനോദങ്ങളിൽ ഏർപ്പെടാനുമുള്ള നഗരാനുഭവമായിരിക്കും സി.ബി.ഡി നൽകുന്നതെന്നും അദ്ദേഹം കൂട്ടിച്ചേർത്തു.
