ദുബൈ:എമിറേറ്റിൽ ഡെലിവറി വാഹനങ്ങൾക്ക് ലൈസൻസ് ലഭിക്കുന്നതിനുള്ള നിബന്ധനകൾ കർശനമാക്കുന്നു. ട്രാഫിക് നിയമങ്ങൾ അവഗണിക്കുന്നതും അമിത വേഗവും കാരണമായി ഇത്തരം വാഹനങ്ങളുണ്ടാക്കുന്ന അപകടങ്ങൾ വർധിച്ച സാഹചര്യത്തിലാണ് നടപടി.
ഇതിന്റെ ഭാഗമായി ദുബൈയിലെ വിവിധ വകുപ്പുകൾ സംയുക്തമായി മോട്ടോർ ബൈക്ക് റൈഡേഴ്സിനായി കാമ്പയിൻ ആരംഭിക്കും. ഡെലിവറി മേഖലയിൽ മോട്ടോർ ബൈക്കുകൾ ഉപയോഗിക്കുന്നത് സൃഷ്ടിക്കുന്ന ട്രാഫിക് പ്രശ്നങ്ങളെ സംബന്ധിച്ച് ചർച്ച ചെയ്യാൻ റോഡ് ഗതാഗത അതോറിറ്റി(ആർ.ടി.എ) ഡയറക്ടർ ജനറൽ മത്വാർ അൽ തായറും ദുബൈ പൊലീസ് കമാൻഡർ ഇൻ ചീഫ് ലഫ്. ജനറൽ അബ്ദുല്ല ഖലീഫ അൽ മാറിയും പങ്കെടുത്ത യോഗത്തിലാണ് ഇക്കാര്യം തീരുമാനിച്ചത്. കോവിഡ് കാലത്ത് ഡെലിവറി വാഹനങ്ങളുടെ ഉപയോഗം ക്രമാതീതമായി വർധിച്ചതോടെ എമിറേറ്റിൽ വാഹനാപകടങ്ങളും കൂടി.