ഇന്ത്യയടക്കം തെരഞ്ഞെടുക്കപ്പെട്ട വിദേശ രാജ്യങ്ങളിലുള്ളവര്‍ക്ക് ദുബായ് സന്ദര്‍ശക വിസ അനുവദിച്ച്‌ തുടങ്ങി. ഇതോടെ മലയാളികള്‍ അടക്കമുള്ള പ്രവാസികള്‍ക്ക് യു.എ.ഇയിലേക്ക് മടങ്ങിവരാന്‍ വഴി തെളിയും. നിലവില്‍ ദുബൈ വിസ മാത്രമാണ് അനുവദിക്കുന്നത്. ആഗസ്റ്റ് ഒന്നോടെ ഇവര്‍ക്ക് പ്രവേശനം അനുവദിക്കുമെന്നാണ് കരുതുന്നത്.
നിലവില്‍ ഇന്ത്യയില്‍ നിന്ന് യു.എ.ഇയിലേക്കുള്ള വിമാന സര്‍വീസ് നിര്‍ത്തിവെച്ചിരിക്കുകയാണെങ്കിലും ആഗസ്റ്റ് ഒന്നിന് വന്ദേഭാരത് അടക്കമുള്ള സര്‍വീസുകള്‍ പുനരാരംഭിക്കും. വന്ദേഭാരതില്‍ ഉള്‍പെടുത്തി എയര്‍ ഇന്ത്യ എക്സ്പ്രസും മറ്റ് സ്വകാര്യ വിമാനക്കമ്ബനികളും ഷെഡ്യൂള്‍ പുറത്തിറക്കിയിട്ടുണ്ട്. അതേസമയം, വിസിറ്റിങ് വിസക്കാര്‍ക്കുള്ള നിബന്ധനകള്‍ പ്രഖ്യാപിച്ചിട്ടില്ല.
നേരത്തെ, അമേരിക്ക അടക്കമുള്ള രാജ്യങ്ങളിലെ സന്ദര്‍ശക വിസക്കാര്‍ക്ക് ദുബൈയിലേക്ക് പ്രവേശനാനുമതി നല്‍കിയിരുന്നു. എന്നാല്‍, ഇന്ത്യയില്‍ നിന്ന് റസിഡന്‍റ് വിസക്കാര്‍ക്ക് മാത്രമായിരുന്നു അനുമതി. ഇതോടെ വിസയില്ലാത്തവര്‍ നാട്ടില്‍ കുടുങ്ങുകയായിരുന്നു.
