കോവിഡ് മാഹാമാരിക്കെതിരെ രാജ്യം നടത്തുന്ന പ്രതിരോധ വാക്സിന്‍ വിപ്ലവത്തിന് പിന്തുണയുമായി ഫുജൈറ കിരീടാവകാശി ശൈഖ് മുഹമ്മദ് ബിന്‍ ഹമദ് അല്‍ ശര്‍ഖി കോവിഡ് വാക്സിന്‍ സ്വീകരിച്ചു. ഫുജൈറ കിരീടാവകാശിയുടെ ഓഫിസിലാണ് വാക്സിന്‍ സ്വീകരിച്ചത്. കോവിഡിനെ തുടച്ചുനീക്കാന്‍ ആരോഗ്യ, കമ്യൂണിറ്റി സംരക്ഷണ മന്ത്രാലയം നടപ്പാക്കുന്ന പദ്ധതിക്കും ദേശീയ പരിപാടികള്‍ക്കുമുള്ള പിന്തുണയുമായാണ് ഫുജൈറയിലെ കിരീടാവകാശി ഷെയ്ഖ് മുഹമ്മദ് ബിന്‍ ഹമദ് ബിന്‍ മുഹമ്മദ് അല്‍ ഷാര്‍ക്കി ആദ്യ ഡോസ് സ്വീകരിച്ചത്.
സമൂഹത്തിലെ എല്ലാ വിഭാഗങ്ങള്‍ക്കും ഏറ്റവും ഉയര്‍ന്ന സുരക്ഷയും ആരോഗ്യ പരിരക്ഷയും ഉറപ്പുവരുത്തുന്നതിന് രാജ്യത്തെ നേതൃത്വത്തിെന്‍റ ബുദ്ധിപൂര്‍വമുള്ള നീക്കത്തെ പ്രശംസിച്ച ശൈഖ് മുഹമ്മദ് ബിന്‍ ഹമദ് അല്‍ ശര്‍ഖി പകര്‍ച്ചവ്യാധിയെ നേരിടുന്നതിനുള്ള പ്രചാരണങ്ങളെ മുന്നില്‍നിന്ന് നയിക്കുന്ന ആരോഗ്യപ്രവര്‍ത്തകെ അഭിനന്ദിക്കുകയും നന്ദി രേഖപ്പെടുത്തുകയും ചെയ്തു.
രാജ്യത്തെ ജനങ്ങള്‍ക്ക് പരിരക്ഷ ഉറപ്പുവരുത്താന്‍ കോവിഡിനെതിരെ മുന്‍നിര പോരാട്ടം നയിക്കുന്നതില്‍ ആരോഗ്യരംഗത്തെ ജീവനക്കാര്‍ നടത്തുന്ന പങ്കിനെയും ആത്മാര്‍ഥതയെയും ശൈഖ് മുഹമ്മദ് ബിന്‍ ഹമദ് അല്‍ ഷാര്‍ക്കി പ്രശംസിച്ചു. ആദ്യപാദവര്‍ഷത്തില്‍ രാജ്യത്തെ ജനസംഖ്യയുടെ 50 ശതമാനത്തിലധികം പേര്‍ക്ക് വാക്സിന്‍ നല്‍കി, സാധാരണ ജീവിതത്തിലേക്ക് മടങ്ങാനുള്ള പ്രയത്നത്തില്‍ എല്ലാവരും പങ്കാളികളാകണമെന്നും ഫുജൈറ കിരീടവകാശി നിര്‍ദേശിച്ചു. കിരീടവകാശിയുടെ ഓഫിസിലെ ഉന്നത ജീവനക്കാര്‍, ദിവാനിലെ ഉന്നത ഉദ്യോഗസ്ഥര്‍ എന്നിവരും കോവിഡ് വാക്സിന്‍ ആദ്യ ഡോസ് സ്വീകരിച്ചു.
