തിങ്കളാഴ്ച ദുബൈ അടക്കം മിക്ക എമിറേറ്റുകളിലും ശൈത്യകാല മഴ ലഭിച്ചു. രാവിലെ മുതൽ പ്രധാന സ്ഥലങ്ങളിലെല്ലാം കാർമേഘാവൃതമായ അന്തരീക്ഷമായിരുന്നു. ഉച്ചയോടെ മിക്ക സ്ഥലങ്ങളിലും ചെറുതും വലുതുമായ മഴ ലഭിച്ചുതുടങ്ങി. രണ്ടു ദിവസം കൂടി മഴ തുടരുമെന്നാണ് കാലാവസ്ഥ നിരീക്ഷണകേന്ദ്രം മുന്നറിയിപ്പ് നൽകുന്നത്.
അബൂദബി, ഷാർജ, റാസൽഖൈമ, അജ്മാൻ, ഉമ്മുൽഖുവൈൻ തുടങ്ങിയ സ്ഥലങ്ങളിലെല്ലാം മഴ ലഭിച്ചിട്ടുണ്ട്. ഈ സാഹചര്യത്തിൽ ഡ്രൈവർമാർ അത്യാവശ്യങ്ങൾക്കുമാത്രം വാഹനവുമായി പുറത്തിറങ്ങണമെന്ന് അധികൃതർ ആവശ്യപ്പെട്ടു.
മൂടിക്കെട്ടിയ കാലാവസ്ഥ തുടരുമെന്നതിനാൽ രാജ്യത്തിന്റെ മിക്ക ഭാഗങ്ങളിലും ‘യെല്ലോ’ അലർട്ട് പുറപ്പെടുവിച്ചിട്ടുണ്ട്.