നഗരപരിധിയില്‍ ഉറവിടമറിയാത്ത കോവിഡ് രോഗികളുടെ എണ്ണം വര്‍ധിച്ചതിനാല്‍ ജില്ലാഭരണകൂടം കര്‍ശന നടപടി തുടങ്ങി. നിയന്ത്രിത മേഖലകളിലെ റോഡുകള്‍ പോലിസ് അടച്ചു. അഞ്ച് ഡിവിഷനുകളില്‍ എക്‌സിറ്റ്, എന്‍ട്രി പോയിന്റുകള്‍ ഒന്നുമാത്രമാക്കി. എറണാകുളം ജില്ലയില്‍ ഇന്നലെ 13 പേര്‍ക്കാണ് കോവിഡ് സ്ഥിരീകരിച്ചത്. ഇതില്‍ ആറുപേര്‍ക്ക് രോഗം വന്നതിന്റെ ഉറവിടം വ്യക്തമായിട്ടില്ല. ഇവരുടെ പ്രാഥമിക സമ്പർക്കപട്ടികയിൽ തന്നെ നിരവധി പേരുള്ളത് ആശങ്ക വര്‍ധിപ്പിച്ചിട്ടുണ്ട്. ഇവരില്‍ പലരും നഗരത്തിലെ ആശുപത്രികള്‍ സന്ദര്‍ശിച്ചതായും കണ്ടെത്തിയിട്ടുണ്ട്. രോഗികളുടെ എണ്ണം കൂടിയാല്‍ നഗരത്തിൽ ട്രിപ്പിള്‍ ലോക്ക്ഡൗണ്‍ വേണ്ടിവരുമെന്നാണ് വിലയിരുത്തല്‍.
