വിജയിച്ചാല് നോക്കൗട്ടിലേക്ക് ഒരു പടികൂടി അടുക്കാമായിരുന്ന കൊല്ക്കത്ത നൈറ്റ് റൈഡേഴ്സിന്റെ മോഹങ്ങള് തകര്ത്തുകൊണ്ട് പഞ്ചാബ് കിങ്സിന് ജയം. അഞ്ചുവിക്കറ്റ് ജയത്തോടെ പഞ്ചാബ് നോക്കൗട്ട് പ്രതീക്ഷകള് നിലനിര്ത്തി. 12 മത്സരങ്ങള് പൂര്ത്തിയാക്കിയ കൊല്ക്കത്തക്കും പഞ്ചാബിനും പത്ത് പോയന്റ് വീതമാണുള്ളത്. റണ്റേറ്റില് മുന്നിലുള്ള കൊല്കത്ത പട്ടികയില് നാലാമതും പഞ്ചാബ് അഞ്ചാമതുമാണ്.
വിജയത്തിലേക്ക് 166 റണ്സ് തേടിയിറങ്ങിയ പഞ്ചാബിനെ നായകന് കെ.എല് രാഹുല് (55പന്തില് 67) മുന്നില് നിന്നും നയിക്കുകയായിരുന്നു. വിക്കറ്റ് സൂക്ഷിച്ച് കളിച്ച കെ.എല് രാഹുല് അവസരത്തിനൊത്ത് പ്രഹരശേഷി ഉയര്ത്തി ടീമിനെ വിജയതീരമടുപ്പിക്കുകയായിരുന്നു. ആദ്യ വിക്കറ്റില് 40 റണ്സെടുത്ത മായങ്ക് അഗര്വാളിനൊപ്പം ചേര്ത്ത 70 റണ്സാണ് പഞ്ചാബിന് അടത്തറയിട്ടത്. നികൊളാസ് പുരാന് 12ഉം എയ്ഡന് മാര്ക്രം 18ഉം ദീപക് ഹൂഡ 3ഉം റണ്സെടുത്ത് പുറത്തായി. 9 പന്തില് നിന്നും 22 റണ്സുമായി ഷാരൂഖ് ഖാന് പഞ്ചാബിന്റെ വിജയം എളുപ്പമാക്കി.