അൽ ഖവാനീജ് റോഡുകളുടെ വികസന പദ്ധതി പൂർത്തിയാക്കി ഗതാഗതത്തിന് തുറന്നുകൊടുത്തു. ഇതോടെ, ദുബൈ-ഷാർജ യാത്ര സുഗമമാകുമെന്നും എമിറേറ്റ്സ് റോഡിൽനിന്ന് ശൈഖ് മുഹമ്മദ് ബിൻ സായിദ് റോഡിലേക്കുള്ള യാത്രാസമയം 25 മിനിറ്റിൽനിന്ന് ഒമ്പതു മിനിറ്റായി കുറയുമെന്നും ദുബൈ റോഡ് ട്രാൻസ്പോർട്ട് അതോറിറ്റി (ആർ.ടി.എ) ചൂണ്ടിക്കാട്ടി. പദ്ധതി യാഥാർഥ്യമായതോടെ എയർപോർട്ട് സ്ട്രീറ്റ്, അൽ അവീർ, അൽ ഖവാനീജ് എന്നിവയെ ബന്ധപ്പെടുന്നുവെന്നതാണ് മറ്റൊരു സുപ്രധാന നേട്ടം.
മൂന്ന് പ്രധാന ഇൻറർചേഞ്ചുകളടങ്ങുന്നതാണ് പദ്ധതി പൂർത്തിയായതോടെ അൽഖവാനീജ് ഇൻറർസെക്ഷനിലെ വാഹനങ്ങളുടെ എണ്ണം മണിക്കൂറിൽ 8000ത്തിൽനിന്ന് 16,000 ആയി ഇരട്ടിക്കും. അൽ ഖവാനീജ് ഇൻറർ സെക്ഷൻ-ശൈഖ് സായിദ് ബിൻ ഹംദാൻ അൽ നെഹ്യാൻ റോഡുകളിലെ കാത്തിരിപ്പ് സമയം 330 സെക്കൻ‍ഡിൽനിന്ന് 45 ആയി കുറയുകയും ചെയ്യുമെന്ന് ആർ.ടി.എ ചെയർമാൻ മതാർ മുഹമ്മദ് അൽ തായർ പറഞ്ഞു.
