ഐ.പി.എല് 2020ലെ ആദ്യ സെഞ്ച്വറിയുമായി നായകന് കെ.എല് രാഹുലിന്റെ വെടിക്കെട്ടിന്റെ കരുത്തില് ബംഗളൂരുവിനെ 97 റണ്സിന് പരാജയപ്പെടുത്തി കിങ്സ് ഇലവന് പഞ്ചാബ്. രാഹുലിന്റെ 132 റണ്സ് ബലത്തില് 206 റണ്സെന്ന കൂറ്റന് സ്കോര് പിന്തുടര്ന്ന കോഹ്ലിപ്പട 17 ഓവറില് 109 റണ്സിന് എല്ലാവരും കൂടാരം കയറി.
ബംഗ്ലൂര് റോയല് ചലഞ്ചേഴ്സ് നായകന് വിരാട് കോഹ്ലി വിട്ടുകളഞ്ഞ ക്യാച്ചിനു പിന്നാലെ, അവസാന രണ്ട് ഒാവറില് റണ്മഴ പെയ്യിച്ച് ലോകേഷ് രാഹുല് ടീമിനെ 206 റണ്സ് എന്ന കൂറ്റന് ടോട്ടലില് എത്തിച്ചു. 69 പന്തില് ഏഴ് സിക്സും 14 ബൗണ്ടറിയും പറത്തിയാണ് 132 റണ്സ് കണ്ടെത്തിയത്.
ടൂര്ണമെന്റ് ചരിത്രത്തില് ഒരു ഇന്ത്യന് താരത്തിന്റെ ഏറ്റവും ഉയര്ന്ന സ്കോറാണിത്. വ്യക്തിഗത സ്കോര് 90ലെത്തിനില്ക്കെയാണ് കോഹ്ലി കൈവിട്ടത്. തൊട്ടുപിന്നാലെ സ്റ്റെയിന് എറിഞ്ഞ 19ാം ഒാവറില് രാഹുല് മൂന്ന് സിക്സുമായി 26 റണ്സെടുത്തു. അവസാന ഒാവറില് 16 റണ്സ് കൂടി.
പഞ്ചാബ് സ്കോറില് പകുതിയിലേറെയും രാഹുലിന്റെ ബാറ്റില്നിന്നു തന്നെ. കരുണ് നായര് (15) പുറത്താവാതെ നിന്നു. മായങ്ക് അഗര്വാള് (26), നികോളസ് പൂരാന് (17), െഗ്ലന് മാക്സ്വെല് (5) എന്നിവരാണ് പുറത്തായത്.