ഓക്സ്ഫോർഡ് സര്വകലാശാല വികസിപ്പിച്ച കോവിഡ് പ്രതിരോധ വാക്സിന്റെ പരീക്ഷണം ഇന്ത്യയില് പുനഃരാരംഭിക്കാന് സെറം ഇന്സ്റ്റിറ്റ്യൂട്ടിന് അനുമതി. പ്രത്യേക നിര്ദേശങ്ങള് പാലിച്ചുകൊണ്ട് വാക്സിന് പരീക്ഷണം പുനഃരാരംഭിക്കാമെന്ന് ഡ്രഗ് കണ്ട്രോളര് ജനറല് ഓഫ് ഇന്ത്യ (ഡി.സി.ജി.ഐ) അറിയിച്ചു. വാക്സിന് പരീക്ഷിച്ച ഒരു വ്യക്തിയില് പാര്ശ്വഫലങ്ങള് ശ്രദ്ധയില്പ്പെട്ടതിനെ തുടര്ന്ന് ഓക്സ്ഫോർഡ് സര്വകലാശാല പരീക്ഷണം താല്ക്കാലികമായി നിര്ത്തിവെച്ചിരുന്നു. തുടര്ന്ന് സെറം ഇന്സ്റ്റിറ്റ്യൂട്ടിനോടും പരീക്ഷണം നിര്ത്തിവെക്കാന് ഡി.സി.ജി.ഐ നിര്ദേശിക്കുകയായിരുന്നു.
സ്ക്രീനിംഗ് സമയത്ത് കൂടുതല് ശ്രദ്ധ നല്കുക, പരീക്ഷണത്തിന് സമ്മതം നല്കുന്നവര്ക്ക് കൂടുതല് വിവരങ്ങള് നല്കുക, പരീക്ഷണത്തിലെ പ്രതികൂല സാഹചര്യങ്ങളെ കുറിച്ച് നിരീക്ഷണം നടത്തുകയും തുടര്പഠനങ്ങള് നടത്തുകയും ചെയ്യണം തുടങ്ങിയ നിര്ദേശങ്ങള് സെറം ഇന്സ്റ്റിറ്റ്യൂട്ടിന് നല്കിയിട്ടുണ്ട്. പ്രതികൂല സാഹചര്യം കൈകാര്യം ചെയ്യുന്നതിനുള്ള പ്രോട്ടോക്കോള് അനുസരിച്ച് ഉപയോഗിക്കുന്ന മരുന്നുകളുടെ വിശദാംശങ്ങള് ഡി.സി.ജി.ഐയുടെ ഓഫീസില് സമര്പ്പിക്കാനും ആവശ്യപ്പെട്ടിട്ടുണ്ട്.