നാലു ഭാഗങ്ങളിലേക്കും വഴിതുറന്ന മനോഹരമായ നടപ്പാലങ്ങൾ തുറന്ന് ആർ.ടി.എ. ദുബൈ മറീന ജങ്ഷനിലാണ് പാലങ്ങൾ തുറന്നത്. ദുബൈയിൽ ആദ്യമായാണ് ഇത്തരമൊരു പാലം നിർമിക്കുന്നത്.ദുബൈ മറീനയിലേക്ക് പ്രവേശിക്കുന്ന ഭാഗത്ത് കിങ് സൽമാൻ ബിൻ അബ്ദുൽ അസീസ് അൽ സാദ് സ്ട്രീറ്റിലാണ് പാലം. നാല് വശത്തും എസ്കലേറ്ററുകൾ വഴി പുറത്തേക്കിറങ്ങാൻ കഴിയും. മണിക്കൂറിൽ 8000 യാത്രക്കാർക്ക് ഇതുവഴി സഞ്ചരിക്കാം.
യു.എ.ഇ വൈസ് പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മക്തൂമിന്റെയും ദുബൈ കിരീടാവകാശിയും എക്സിക്യൂട്ടിവ് കൗൺസിൽ ചെയർമാനുമായ ശൈഖ് ഹംദാൻ ബിൻ മുഹമ്മദ് ബിൻ റാശിദ് ആൽ മക്തൂമിന്റെയും ദീർഘവീക്ഷണത്തിന്റെ ഫലമായാണ് പദ്ധതി യാഥാർഥ്യമായതെന്ന് ആർ.ടി.എ ഡയറക്ടർ ജനറൽ മത്താർ അൽതായർ പറഞ്ഞു.