പൈതൃകകാഴ്ചകളുടെ വിസ്മയങ്ങളൊരുക്കുന്ന ഷാർജ ഹെറിറ്റേജ് ഡെയ്‌സിന്റെ 18-ാം പതിപ്പിന് തുടക്കമായി. അഞ്ഞൂറിലേറെ പരിപാടികളും 29 രാജ്യങ്ങളിൽനിന്നുള്ള പരമ്പരാഗത കലാരൂപങ്ങളും അടുത്തറിയാനുള്ള അവസരമാണ് ഹെറിറ്റേജ് ഡെയ്‌സിൽ കാത്തിരിക്കുന്നത്. ഏപ്രിൽ 10 വരെ മൂന്നാഴ്ചക്കാലം ഷാർജ ഹെറിറ്റേജ് പ്രദേശത്താണ് പരിപാടി.
കർശന കോവിഡ് സുരക്ഷാ മാനദണ്ഡങ്ങളോടെയാണ് പ്രദർശനം. യു.എ.ഇ.യുടെ ചരിത്രം, സംസ്കാരം, ആചാരങ്ങൾ എന്നിവയെല്ലാം അടുത്തറിയാനും ഇതിലൂടെ സാധിക്കും. സാംസ്കാരിക പൈതൃകം നമ്മെ ഒരുമിപ്പിക്കുന്നു എന്ന പ്രമേയത്തിലാണ് ഈ വർഷത്തെ മേള. ഇന്ത്യ ഉൾപ്പെടെ ഈ വർഷം ബെലാറസ്, മാസിഡോണിയ, താജിക്കിസ്താൻ, സൗദി അറേബ്യ, ഒമാൻ, കുവൈത്ത്‌, ബഹ്‌റൈൻ, മാലിദ്വീപ്, യെമെൻ, ഈജിപ്ത്, ഇറ്റലി, സ്പെയിൻ, ഫ്രാൻസ്, സുഡാൻ, ലെബനൻ, മൊറോക്കോ തുടങ്ങിയ രാജ്യങ്ങളും മേളയിൽ പങ്കെടുക്കുന്നുണ്ട്.
