നിർമിത ബുദ്ധി സംവിധാനം ഉപയോഗിച്ച് സേവനം മെച്ചപ്പെടുത്താൻ ഒരുങ്ങുകയാണ് ഷാർജയിലെ ടാക്സികൾ. ഡ്രൈവർമാരുടെ പെരുമാറ്റം നിരീക്ഷിച്ച് അപകടങ്ങൾ കുറക്കുകയാണ് ലക്ഷ്യം. ഉറക്കം തൂങ്ങിയുള്ള ഡ്രൈവിങ്ങും മൊബൈൽ ഉപയോഗവും ഇതിലൂടെ കണ്ടുപിടിക്കാം. കാമറകളും സെൻസറുകളും ഘടിപ്പിക്കുന്നതുവഴി ഡ്രൈവിങ് രീതി തത്സമയം നിരീക്ഷിക്കാൻ അധികൃതർക്ക് സാധ്യമാകും. നിർമിത ബുദ്ധി ഉപയോഗിച്ച് ടാക്സികളിൽ സ്മാർട്ട് സംവിധാനം ഏർപ്പെടുത്തുന്ന പശ്ചിമേഷ്യയിലെ ആദ്യ നഗരമാവുകയാണ് ഷാർജ. സുരക്ഷയുടെ ആഗോള മാനദണ്ഡങ്ങൾക്കനുസരിച്ച് പൊതുജനങ്ങൾക്ക് നൽകുന്ന സേവനങ്ങളുടെ നിലവാരം ഉയർത്താൻ ലക്ഷ്യമിട്ടുള്ള ഷാർജയുടെ ഡിജിറ്റൽ പദ്ധതികളുടെ ഭാഗമായാണ് പദ്ധതിക്ക് തുടക്കമിടുന്നത്.