ഇന്ത്യയിൽ സര്വകലാശാലകളിലെ അവസാനവര്ഷ പരീക്ഷകള് മുഴുവൻ സെപ്തംബര് മാസം 30 നുള്ളിൽ പൂര്ത്തിയാക്കണമെന്ന യു.ജി.സി നിര്ദേശം സുപ്രീംകോടതി ശരിവച്ചു. പരീക്ഷ നടത്തി മുന്നോട്ട് പോകണം എന്നും അല്ലെങ്കില് വിദ്യാര്ത്ഥികളുടെ ഭാവി ആശങ്കയിലാകുമെന്നും കാണിച്ച് യു.ജി.സി നൽകിയ വിശദീകരണം സുപ്രീംകോടതി ശരിവയ്ക്കുകയായിരുന്നു. യു.ജി.സിയുടെ നിര്ദേശത്തെ പിന്തുണച്ച കേന്ദ്ര ആഭ്യന്തരമന്ത്രാലയം പരീക്ഷ നടത്തിപ്പിനായി രാജ്യത്തെ കോളേജുകള് തുറക്കാമെന്നും കോടതിയെ അറിയിച്ചു. ഇതേ തുടര്ന്നായിരുന്നു അവസാനവര്ഷ പരീക്ഷകള് നടത്താന് സുപ്രീംകോടതി അനുമതി നല്കിയത്. അതേസമയം പരീക്ഷ നടത്തിപ്പുമായി ബന്ധപ്പെട്ട സംസ്ഥാനങ്ങളില് കൊവിഡ് വ്യാപനം രൂക്ഷമാണെങ്കില് അക്കാര്യം സര്ക്കാരുകള്ക്ക് യു.ജി.സിയെ അറിയാക്കാമെന്നും കോടതി വ്യക്തമാക്കിയിട്ടുണ്ട്.