റമദാനില്‍ ദുബായ് ഹെല്‍ത്ത് അതോറിറ്റിക്കു കീഴില്‍ പ്രവര്‍ത്തിക്കുന്ന കോവിഡ് പരിശോധന-വാക്സിന്‍ വിതരണകേന്ദ്രങ്ങളുടെ പ്രവൃത്തിസമയം പ്രഖ്യാപിച്ചു. ഡി.എച്ച്.എക്കു കീഴിലെ ആശുപത്രികള്‍, കോവിഡ്-19 സ്ക്രീനിങ്, ക്ലിനിക്കുകള്‍, വാക്സിനേഷന്‍ കേന്ദ്രങ്ങള്‍ എന്നിവയുടെ പ്രവര്‍ത്തന സമയമാണ് പ്രഖ്യാപിച്ചത്.
വാക്സിനേഷന്‍ കേന്ദ്രങ്ങള്‍ രാവിലെ എട്ടിന് ആരംഭിച്ച്‌ ഉച്ചയോടെ പ്രവര്‍ത്തനം അവസാനിപ്പിക്കുന്ന തരത്തിലാണ് പുതിയ പരിഷ്കരണം. എന്നാല്‍, കോവിഡ് പരിശോധന കേന്ദ്രങ്ങളായ അല്‍ ബദ ആരോഗ്യകേന്ദ്രം, അല്‍ ഖവാനീജ് ആരോഗ്യകേന്ദ്രം, ദുബായ് മുനിസിപ്പാലിറ്റി ആരോഗ്യകേന്ദ്രം എന്നിവ റമദാനിലും തുടര്‍ച്ചയായി മുഴുവന്‍ സമയവും പ്രവര്‍ത്തിക്കും. ദുബായില്‍ പ്രവര്‍ത്തിക്കുന്ന വാക്സിനേഷന്‍ കേന്ദ്രങ്ങള്‍ ഞായര്‍ മുതല്‍ വ്യാഴം വരെയുള്ള ദിവസങ്ങളില്‍ രാത്രി ഒമ്ബതു മുതല്‍ അര്‍ധരാത്രി വരെ പ്രവര്‍ത്തിക്കും. വെള്ളി, ശനി ദിവസങ്ങളില്‍ രാവിലെ ഒമ്ബതുമുതല്‍ വൈകുന്നേരം നാലുവരെയുള്ള സമയത്ത് കേന്ദ്രങ്ങളിലെത്തി വാക്സിന്‍ സ്വീകരിക്കാം. അതെ സമയം , റമദാനിലെ അവാസന 10 ദിവസങ്ങളില്‍ പകല്‍ സമയത്തുള്ള ഷിഫ്റ്റില്‍ മാത്രമായിരിക്കും കേന്ദ്രങ്ങള്‍ പ്രവര്‍ത്തിക്കുക. എല്ലാ ഡി.എച്ച്.എ ആശുപത്രികളിലെയും അത്യാഹിത വിഭാഗങ്ങളും പ്രവര്‍ത്തനക്ഷമമായിരിക്കും.
ഡി.എച്ച്.എയുടെ നാദ് അല്‍ ഹമര്‍, എയര്‍പോര്‍ട്ട് മെഡിക്കല്‍ സെന്‍റര്‍, അല്‍ ബര്‍ഷ, തുടങ്ങിയ പ്രാഥമിക ആരോഗ്യകേന്ദ്രങ്ങള്‍ എന്നിവ എല്ലാ ദിവസവും പ്രവര്‍ത്തന സജ്ജമാകും. അതെ സമയം രാജ്യത്തെ മറ്റെല്ലാ പ്രാഥമിക ആരോഗ്യ കേന്ദ്രങ്ങളും രാവിലെ ഒമ്ബതു മുതല്‍ ഉച്ച കഴിഞ്ഞ് മൂന്നുവരെയും രാത്രി എട്ടുമുതല്‍ രാത്രി 11 വരെയും പ്രവര്‍ത്തിക്കും. ബേബി, മെറ്റേണിറ്റി കേന്ദ്രമായ അല്‍ മംസര്‍ ആരോഗ്യകേന്ദ്രം രാവിലെ ഒമ്ബതുമുതല്‍ വൈകുന്നേരം ആറുവരെ പ്രവര്‍ത്തിക്കും.
