കുവൈത്തില്‍ 25 ലക്ഷത്തിലധികം പേര്‍ കോവിഡ് പ്രതിരോധ കുത്തിവെപ്പെടുത്തു.രാജ്യത്ത് ഒരു ദിവസം 30,000ത്തോളം പേര്‍ക്ക് വാക്സിന്‍ നല്‍കുന്നുണ്ട്. അതേസമയം രാജ്യത്ത് വാക്സിന്‍ നല്‍കിയവര്‍ക്ക് ഗുരുതരമായ പാര്‍ശ്വഫലങ്ങളോ മറ്റ് ബുദ്ധിമുട്ടുകളോ ഇതുവരെ റിപ്പോര്‍ട്ട് ചെയ്തിട്ടില്ല.ഒരു കിലോമീറ്ററോളം നീളുന്ന വലിയ വരി മിഷ്രിഫിലെ വാക്സിനേഷന്‍ കേന്ദ്രത്തിന് മുന്നില്‍ കാണാറുണ്ടെങ്കിലും നിരവധി കൗണ്ടറുകളുള്ളതിനാല്‍ പെട്ടെന്ന് പൂര്‍ത്തിയാകുന്നുണ്ട്. പരമാവധി ഒരു മണിക്കൂറിനുള്ളില്‍ വാക്സിന്‍ എടുത്ത് മടങ്ങാന്‍ കഴിയുന്നു.
അതേസമയം രാജ്യത്ത് 20ാമത് ബാച്ച്‌ ഫൈസര്‍ വാക്സിന്‍ ഞായറാഴ്ച എത്തിക്കും. ഒരു ലക്ഷം ഡോസ് വാക്സിന്‍ കൂടിയാണ് എത്തിക്കുക. എല്ലാ ആഴ്ചയും ഫൈസര്‍ ഷിപ്മെന്‍റുള്ളത് കുവൈത്തിന് വലിയ ആശ്വാസമാണ്. കുത്തിവെപ്പ് ദൗത്യം വേഗത്തിലാക്കാന്‍ കുവൈത്തിന് കൂടുതല്‍ ഡോസ് മരുന്ന് ലഭിക്കേണ്ടതുണ്ട്. ഫൈസര്‍ വാക്സിന്‍ ഫലപ്രദമാണെന്നാണ് കുവൈത്ത് ആരോഗ്യ മന്ത്രാലയത്തിന്റെ വിലയിരുത്തല്‍.
