ശരത്കാലം വിരുന്നെത്തിയതോടെ യു.എ.ഇയുടെ ഉയരങ്ങളില് പ്രകൃതി ഒരുക്കിയ മനോഹര വിനോദകേന്ദ്രമായ റാസല്ഖൈമ ജബല് ജൈസിലേക്ക് കൂടുതല് സന്ദര്ശകര് എത്തിത്തുടങ്ങി. യാത്രയിലുടനീളം വന്യമായ അനുഭൂതി നല്കുന്ന ജബല് ജൈസില് അധികൃതര് കൂടുതല് സാഹസിക -വിനോദ- അടിസ്ഥാന സൗകര്യങ്ങള് ഒരുക്കിയിട്ടുണ്ട്. അടുത്തവാരം പ്രവര്ത്തനം ആരംഭിക്കുന്ന യു.എ.ഇയുടെ ഏറ്റവും ഉയരത്തിലുള്ള ഭക്ഷണശാലയോടൊപ്പം ബീയ്ര് ഗ്രില്സ് എക്സ്പോളേര്സ് ക്യാമ്പിെൻറ (ബി.ജി.ഇ.സി) പ്രവര്ത്തനവും ഒക്ടോബറില് ജബല് ജൈസില് തുടങ്ങുമെന്ന പ്രഖ്യാപനവും സന്ദര്ശകരില് ആകാംഷയുണർത്തി.
ബീയ്ര് ഗ്രില്സ് സര്വൈവല് അക്കാദമിയില് ഇതുമായി ബന്ധപ്പെട്ട പരിശീലനവും നല്കും. യു.കെ കേന്ദ്രമായ ബി.ജി.ഇ.സിയുടെ മിഡില് ഈസ്റ്റിലെ പ്രഥമ സംരംഭമാണ് ജബല് ജൈസിലേതെന്നതും ശ്രദ്ധേയമാണ്. ഇതോടനുബന്ധിച്ചുള്ള ഹോട്ടല് സംവിധാനം 2021ല് പ്രവര്ത്തനസജ്ജമാകും. രണ്ടുവര്ഷം മുമ്പ് ലോകത്തിലെ നീളമേറിയ സിപ്പ്ലൈന് ജബല് ജൈസില് പ്രവര്ത്തിച്ച് തുടങ്ങിയിരുന്നു. ഗിന്നസ് റെക്കോഡ് നേടിയ സിപ്പ്ലൈന് സമാന്തരമായി പുതിയ രണ്ട് സിപ്പ്ലൈന് കൂടി അധികൃതര് ഇവിടെ ഒരുക്കിയിരുന്നു. പ്രകൃതി കനിഞ്ഞുനല്കിയ വിസ്മയ കാഴ്ചകള്ക്കൊപ്പം അധികൃതരുടെ മുന്കൈയില് നടന്ന വികസന പ്രവര്ത്തനങ്ങളാണ് സാഹസിക വിനോദസഞ്ചാരികള്ക്ക് മാത്രം പ്രാപ്യമായിരുന്ന ജബല് ജൈസിനെ സാധാരണക്കാര്ക്കും ലഭ്യമാക്കിയത്.