ഒമാനിൽ 1177 പേർക്ക് കൂടി കോവിഡ് സ്ഥിരീകരിച്ചു. ഇതോടെ രാജ്യത്തെ മൊത്തം രോഗ ബാധിതർ 45106 ആയി. 2992 പേർക്കാണ് പരിശോധന നടത്തിയത്. പുതിയ രോഗികളിൽ 969 പേരും സ്വദേശികളാണ്. 208 പ്രവാസികൾ മാത്രമാണ് ഉള്ളത്. 799 പേർക്ക് കൂടി രോഗം ഭേദമായിട്ടുണ്ട്. ഇതോടെ രോഗമുക്തരായവരുടെ എണ്ണം 26968 ആയി. പത്തുപേർ കൂടി മരണപ്പെട്ടതോടെ മരണസംഖ്യ 203 ആയി ഉയരുകയും ചെയ്തു. 59 പേരെ കൂടി ആശുപത്രിയിൽ പ്രവേശിപ്പിച്ചു. 452 പേരാണ് ഇപ്പോൾ ആശുപത്രികളിൽ ചികിത്സയിലുള്ളത്. ഇതിൽ 116 പേർ തീവ്ര പരിചരണ വിഭാഗത്തിലാണുള്ളത്.
17935 പേരാണ് നിലവിൽ അസുഖബാധിതരായിട്ടുള്ളത്. പുതിയ രോഗികളിൽ 368 പേരാണ് മസ്കത്ത് ഗവർണറേറ്റിൽ നിന്നുള്ളത്. ഇതോടെ മസ്കത്തിലെ ആകെ രോഗികളുടെ എണ്ണം 28846 ആയി. ഇതിൽ 18589 പേർക്ക് അസുഖം ഭേദമായിട്ടുണ്ട്. സീബിലാണ് ഇന്നും കൂടുതൽ രോഗികൾ. 175 പുതിയ കേസുകളാണ് ഇവിടെ റിപ്പോർട്ട് ചെയ്യപ്പെട്ടത്. 66 പുതിയ രോഗികളുള്ള അമിറാത്ത് രണ്ടാമതാണ്. ബോഷറാണ് മൂന്നാം സ്ഥാനത്ത്. നാലാമതുള്ള മത്രയിൽ 32 പുതിയ രോഗികളാണ് ഉള്ളത്. മരണപ്പെട്ടതിൽ 132 പേരും മസ്കത്തിൽ ചികിത്സയിലിരുന്നവരാണ്. വടക്ക്, തെക്കൻ ബാത്തിന ഗവർണറേറ്റുകളിലും 200ന് മുകളിൽ പുതിയ രോഗികളുണ്ട്.
