സൗദിയിൽ 3921 പേർക്കാണ് കഴിഞ്ഞ 24 മണിക്കൂറിനുള്ളിൽ രോഗബാധ സ്ഥിരീകരിച്ചത്. 1010 പേർക്ക് രോഗം ഭേദമായി. ആകെ രോഗബാധിതരുടെ എണ്ണം 119942 ഉം രോഗമുക്തരുടെ എണ്ണം 81029 ഉം ആയി. 38020 പേർ രാജ്യത്തെ വിവിധ ആശുപത്രികളിലായി ചികിത്സയിൽ തുടരുന്നു. പുതുതായി 27324 സാമ്പിളുകളാണ് പരിശോധിച്ചത്. രാജ്യത്ത് ഇതുവരെ നടന്ന കോവിഡ് പരിശോധനകളുടെ എണ്ണം 1069636 ആയി.
സൗദി അറേബ്യയുടെ തലസ്ഥാന നഗരം പുതിയ രോഗികളുടെ എണ്ണത്തിലും മരണനിരക്കിലും ഞെട്ടിക്കുന്നു. ലോക്ഡൗൺ ഇളവിന് ശേഷം കഴിഞ്ഞ ദിവസങ്ങളിൽ രാജ്യത്തെ മറ്റ് ഭാഗങ്ങളെ അപേക്ഷിച്ച് രോഗവ്യാപനത്തിന്റെ കൂടിയ കണക്കാണ് റിയാദിൽ നിന്ന് പുറത്തുവരുന്നത്. വെള്ളിയാഴ്ച റിയാദ് നഗരത്തിൽ മാത്രമായി 1584 ആളുകളിലാണ് പുതുതായി രോഗം സ്ഥിരീകരിച്ചത്. രോഗവ്യാപനത്തിെൻറ തോതിൽ ഒപ്പമുണ്ടായിരുന്ന ജിദ്ദയിൽ പോലും പുതിയ രോഗികളുടെ എണ്ണം 391 മാത്രമാണ്.
ആരോഗ്യമുൻകരുതൽ നിർദേശങ്ങൾ പാലിക്കാൻ ആളുകൾ തയാറായില്ലെങ്കിൽ റിയാദിൽ തീർത്തും അപകടകരമായ അവസ്ഥ വന്നുചേരുമെന്ന് ആരോഗ്യമന്ത്രാലയം മുന്നറിയിപ്പ് നൽകുന്നു. റിയാദിൽ മരണ സംഖ്യയും വലിയ തോതിൽ ഉയരുന്നുണ്ട്. രാജ്യമാകെ 36 പേരുടെ മരണമാണ് വെള്ളിയാഴ്ച രേഖപ്പെടുത്തിയത്.