കിരീടാവകാശിയും യു.എ.ഇ സായുധ സേന ഡെപ്യൂട്ടി സുപ്രീം കമാൻഡറുമായ ഷെയ്ക്ക് മുഹമ്മദ് ബിൻ സായിദ് ആൽ നഹ്‌യാൻ അൽഐനിലെ സ്ട്രാറ്റ എയ്റോസ്പേസ് നിർമാണ കേന്ദ്രം സന്ദർശിച്ചു. ഗൾഫിലെ ഏറ്റവും വലിയ വിമാന ഭാഗങ്ങൾ നിർമിക്കുന്നതും യു.എ.ഇയുടെ സാമ്പത്തിക വൈവിധ്യവത്കരണ ശ്രമങ്ങളെ സഹായിക്കുകയും ചെയ്യുന്ന പ്രധാന സ്ഥാപനമാണ് സ്ട്രാറ്റ.
എയർബസ് എ 380, എ 330 വിമാനങ്ങൾ, ബോയിങ് 777, 777 എക്‌സ്, 787 ഡ്രീംലൈനറുകൾ എന്നിവയുൾപ്പെടെയുള്ള ജെറ്റ് വിമാനങ്ങളുടെ ചിറകുകൾ, ടെയിൽ ഫിനുകൾ എന്നിവയുടെ സംയോജിത ഭാഗങ്ങളും കമ്പനി നിർമിക്കുന്നു. എയ്റോസ്പേസ് മേഖലയിലെ ആഗോള മികവിന് സംഭാവന നൽകുന്ന വൈഡ് ബോഡികൾ, ബിസിനസ് ജെറ്റുകൾ, ടർബോപ്രോപ്പുകൾ എന്നിവയിൽ സ്ട്രാറ്റ ഒട്ടേറെ ഭാഗങ്ങൾ നിർമിക്കുന്നു.
അന്താരാഷ്ട്ര എയ്റോസ്പേസ് മേഖലയിലെ പ്രമുഖ നിർമാതാക്കളായ ബോയിങ്, എയർബസ്, ലിയനാർഡോ, സ്വിറ്റ്സർലൻഡിലെ പിലാറ്റസ് എയർക്രാഫ്റ്റ് എന്നിവ കോടിക്കണക്കിന് ഡോളർ വിലമതിക്കുന്ന വിമാനങ്ങളുടെ ഭാഗങ്ങളാണ് നിർമിക്കുന്നത്. പ്രമുഖ വിമാന നിർമാതാക്കളായ എയർബസ്, ബോയിങ് എന്നീ സ്ഥാപനങ്ങളുമായുള്ള പങ്കാളിത്തത്തിലൂടെയാണ് മുബാദല ഇൻവെസ്റ്റ്മെൻറ് കമ്പനി എയ്റോസ്പേസ് നിർമാണ യൂനിറ്റ് 2009ൽ അൽഐനിൽ സ്ഥാപിച്ചത്.
എൻ95 മാസ്‌ക്കുകളുടെ നിർമാണം മുബാദല ഹണിവെൽ കമ്പനിയുമായി യോജിച്ച് സ്ട്രാറ്റ കമ്പനിയിൽ എൻ95 മാസ്‌ക്കുകളുടെ നിർമാണവും അടുത്തിടെ ആരംഭിച്ചു. ഇതിെൻറ ഭാഗമായി വ്യാവസായിക കമ്പനിയായ ഹണിവെല്ലുമായുള്ള പങ്കാളിത്തം മുബാദല കഴിഞ്ഞമാസം പ്രഖ്യാപിച്ചിരുന്നു. പ്രതിദിനം 90,000 മാസ്‌ക്കുകൾ നിർമിക്കാനും 30 ദശലക്ഷത്തിലധികം മാസ്‌ക്കുകളുടെ വാർഷിക ഉൽപാദന ശേഷിക്കുള്ള സൗകര്യമൊരുക്കാനുമുള്ള സംവിധാനമാണ് ഒരുക്കിയിരിക്കുന്നത്.
