ദുബായില്‍ ഡ്രൈവറില്ലാ വാഹനങ്ങള്‍ 2023ല്‍ നിരത്തുകളില്‍ സജീവമാകും.ദുബൈ റോഡ് ഗതാഗത അതോറിറ്റി (ആര്‍.ടി.എ) പൊതുഗതാഗത ഏജന്‍സി സി.ഇ.ഒ അഹമ്മദ് ഹാഷിം ബെഹ്റോസിയാന്‍ ആണ് ഇക്കാര്യം അറിയിച്ചത് . ബുധനാഴ്ച ദുബൈ വേള്‍ഡ് ട്രേഡ് സെന്‍ററില്‍ ആരംഭിച്ച ‘ലോക ഡ്രൈവര്‍രഹിത വാഹനഗതാഗത കോണ്‍ഗ്രസി’നിടെ മാധ്യമങ്ങളോട് സംസാരിക്കുകയായിരുന്നു അദ്ദേഹം.
2023ഓടെ ദുബൈ നഗരത്തിലെ അഞ്ചു ശതമാനം ടാക്സികള്‍ ഡ്രൈവറില്ലാ വാഹനങ്ങളാക്കുമെന്ന് നേരത്തേ പ്രഖ്യാപിക്കപ്പെട്ടിരുന്നു. ഇതു നടപ്പിലാക്കുന്നതിനായി ജനറല്‍ മോട്ടോഴ്സിന് കീഴിലുള്ള ക്രൂയിസുമായി ആര്‍.ടി.എ കരാറിലെത്തിയിട്ടുമുണ്ട്. യു.എസിന് പുറത്ത് ആദ്യമായി ഡ്രൈവറില്ലാ വാഹന സര്‍വിസ് ആരംഭിക്കുന്ന ആദ്യ നഗരമായി ദുബൈ ഇതോടെ മാറും. പദ്ധതി ആരംഭിക്കുന്നതിന് മുന്നോടിയായി നടപ്പിലാക്കേണ്ട നിയന്ത്രണങ്ങളും നിയമങ്ങളും വേഗത്തില്‍ തയാറാക്കുന്നതായാണ് ആര്‍.ടി.എ ഉന്നത ഉദ്യോഗസ്ഥന്‍ വെളിപ്പെടുത്തിയിരിക്കുന്നത്.
