പതിനേഴാം വയസില്‍ ഇന്ത്യന്‍ ടെസ്റ്റ് ടീമില്‍ അരങ്ങേറ്റം കുറിച്ച വിക്കറ്റ് കീപ്പര്‍ ബാറ്റ്സ്മാന്‍ പാര്‍ഥിവ് പട്ടേല്‍ ക്രിക്കറ്റില്‍ നിന്നും വിരമിച്ചു. ഇന്ത്യയ്ക്ക് വേണ്ടി 25 ടെസ്റ്റിലും 38 ഏകദിനങ്ങളിലും താരം കളിച്ചിട്ടുണ്ട്.
ഇന്ത്യയില്‍ ആഭ്യന്തര ക്രിക്കറ്റ് സീസണ്‍ ആരംഭിക്കാനിരിക്കേയാണ് ഗുജറാത്ത് നായകനായ പാര്‍ഥിവ് ക്രിക്കറ്റിനോട് പൂര്‍ണമായും വിടപറഞ്ഞത്. 35 വയസുകാരനായ പാര്‍ഥിവ് ടെസ്റ്റില്‍ ഏഴ് അര്‍ധ സെഞ്ചുറികള്‍ ഉള്‍പ്പടെ 934 റണ്‍സ് നേടിയിട്ടുണ്ട്. ഏകദിനത്തില്‍ നാല് അര്‍ധ സെഞ്ചുറികള്‍ ഉള്‍പ്പടെ 736 റണ്‍സാണ് സമ്ബാദ്യം. ഉയര്‍ന്ന സ്കോര്‍ 95.
ഫസ്റ്റ് ക്ലാസ് ക്രിക്കറ്റില്‍ 27 സെഞ്ചുറികളും 62 അര്‍ധ സെഞ്ചുറികളും ഉള്‍പ്പടെ 11,240 റണ്‍സ് സ്കോര്‍ ചെയ്തിട്ടുണ്ട്. പാര്‍ഥിവിന് കീഴില്‍ ഗുജറാത്ത് രഞ്ജി ട്രോഫിയും വിജയ് ഹസാരെ ട്രോഫിയും നേടി. ഐപിഎല്ലില്‍ ആറ് ടീമുകള്‍ക്കായി കളിച്ച താരം മൂന്ന് തവണ കിരീടം നേടിയ ടീമിന്‍റെ ഭാഗമായിട്ടുണ്ട്. മുംബൈ ഇന്ത്യന്‍സിനൊപ്പം രണ്ടു തവണയും ചെന്നൈ സൂപ്പര്‍ കിംഗ്സിനൊപ്പം ഒരു തവണയുമായിരുന്നു കിരീട നേട്ടം.
