ജീവിത നിലവാരം, താമസ കെട്ടിട വിവരങ്ങള്‍, കുറ്റകൃത്യ നിരക്കുകള്‍, ആരോഗ്യ സംരക്ഷണ നിലവാരം, ഗതാഗത നിലവാരം, മറ്റ് സ്ഥിതിവിവരക്കണക്കുകള്‍ എന്നിവ അടിസ്ഥാനപ്പെടുത്തിയാണ് ലോകത്തിലെ ഏറ്റവും വലിയ ജീവിതച്ചെലവ് ഡാറ്റാബേസായ നംബിയോ പട്ടിക തയ്യാറാക്കുന്നത്.
ദോഹ: ലോകത്തിലെ ഏറ്റവും വലുതും ആധികാരികവുമായ ആഗോള ഡാറ്റാബേസായ നംബിയോയുടെ ഏറ്റവും പുതിയ ജീവിതനിലവാര സൂചികയില്‍ ഗള്‍ഫില്‍ വീണ്ടും മുന്നിലെത്തി ഖത്തര്‍. 2023ലെ ക്വാളിറ്റി ഓഫ് ലൈഫ് ഇന്‍ഡക്‌സില്‍ 169.77 പോയിന്റ് നേടിയാണ് ഖത്തര്‍ മികച്ച സ്ഥാനം അലങ്കരിച്ചത്.
ജനങ്ങളുടെ ഉയര്‍ന്ന വാങ്ങല്‍ ശേഷി, രാജ്യത്തെ മികച്ച സുരക്ഷ, കുറഞ്ഞ കുറ്റകൃത്യ നിരക്ക്, മികച്ച ആരോഗ്യ സംരക്ഷണം എന്നിവയാണ് ഖത്തറിനെ ജീവിതനിലവാര സൂചികയില്‍ മുന്നിലെത്തിച്ചത്. ഖത്തറിന് പിന്നിലായി 162.41 പോയിന്റുമായി യുഎഇ ഗള്‍ഫില്‍ രണ്ടാമതെത്തി. സൗദി അറേബ്യ (149.43), ബഹ്‌റൈന്‍ (144.59), കുവൈറ്റ് (134.57) എന്നിങ്ങനെയാണ് പോയിന്റ് നില.
വാങ്ങല്‍ ശേഷിയില്‍ ഖത്തറിന് 127.79 പോയിന്റും സുരക്ഷാ സൂചികയില്‍ 84.56 പോയന്റും ആരോഗ്യ സംരക്ഷണ സൂചികയില്‍ 73.13 പോയിന്റുമാണുള്ളത്. ഇവയിലൊക്കെ ഗള്‍ഫ് മേഖലയിലെ മറ്റു രാജ്യങ്ങളേക്കാള്‍ ഉയര്‍ന്ന സ്ഥാനം ഖത്തറിനുണ്ട്.
നംബിയോ ക്രൈം ഇന്‍ഡക്‌സില്‍ ലോകത്തിലെ സുരക്ഷിത രാജ്യം എന്ന സ്ഥാനം ഖത്തര്‍ നിലനിര്‍ത്തി. 2017 മുതല്‍ ഖത്തര്‍ ഈ സ്ഥാനത്തുണ്ട്. സുരക്ഷിത നഗരങ്ങളുടെ പട്ടികയില്‍ ഖത്തര്‍ തലസ്ഥാനമായ ദോഹ ഉയര്‍ന്ന സ്ഥാനം നിരവധി തവണ അലങ്കരിച്ചിരുന്നു.
നംബിയോ ഹെല്‍ത്ത് കെയര്‍ സൂചികയില്‍ 2021ല്‍ ഖത്തര്‍ 73 പോയിന്റുമായി ലോകത്തെ മികച്ച 20 രാജ്യങ്ങളില്‍ ഇടം നേടിയിരുന്നു. സമീപവര്‍ഷങ്ങളിലായി വിവിധ ഏജന്‍സികളുടെ അന്താരാഷ്ട്ര റാങ്കിങില്‍ നിരവധി മേഖലകളില്‍ രാജ്യം ഒന്നാം സ്ഥാനത്താണ്. സുരക്ഷ, ആരോഗ്യ സംരക്ഷണം, സമാധാനം തുടങ്ങി നിരവധി മേഖലകളാണ് ഖത്തറിന് കരുത്തായത്.
ഖത്തര്‍ കെഎംസിസി അനുശോചന സംഗമം
ദോഹ: വയനാട് മുസ്‌ലിം യത്തീംഖാന ജനറല്‍ സെക്രട്ടറിയും മുസ്‌ലിം ലീഗ് വയനാട് ജില്ലാ സീനിയര്‍ വൈസ് പ്രസിഡന്റും സംസ്ഥാന മുസ്‌ലിം ലീഗ് സെക്രട്ടറിയേറ്റ് മെമ്പറുമായിരുന്ന എംഎ മുഹമ്മദ് ജമാലിന്റെ വിയോഗത്തില്‍ ഖത്തര്‍ കെഎംസിസി അനുശോചന-പ്രാര്‍ഥനാ സംഗമം നടത്തി.
കെഎംസിസി ഖത്തര്‍ സംസ്ഥാന ജനറല്‍ സെക്രട്ടറി സലീം നാലകത്ത് അധ്യക്ഷത വഹിച്ചു. കെഎംസിസി ഖത്തര്‍ സംസ്ഥാന കമ്മിറ്റി, വയനാട് ജില്ലാ കമ്മിറ്റി, വയനാട് മുസ്‌ലിം യതീംഖാന ഖത്തര്‍ ചാപ്റ്റര്‍ എന്നിവയുടെ സംയുക്ത ആഭിമുഖ്യത്തില്‍ നടന്ന അനുശോചന യോഗത്തില്‍ കൊടക്കല്‍ സയ്യിദ് സഖാഫ് തങ്ങള്‍ പ്രാര്‍ഥന നടത്തി. ഉപദേശക സമിതി വൈസ് ചെയര്‍മാന്‍ എസ്എഎം ബഷീര്‍ അനുസ്മരണ പ്രഭാഷണം നടത്തി. റഈസലി വയനാട്, ജില്ലാ പ്രസിഡന്റ് ഇസ്മായില്‍ വപ്പനത്തില്‍, ജനറല്‍ സെക്രട്ടറി അശ്റഫ് പൂന്തോടന്‍, ഹമീദ് ഹാജി മരുന്നൂര്‍, പിവി മുഹമ്മദ് മൗലവി, അബു മണിച്ചിറ, കെഎ ഹബീബ്, അബ്ദു പാപ്പിനിശ്ശേരി, അടിയോട്ടില്‍ അഹമ്മദ് തുടങ്ങിയവര്‍ സംബന്ധിച്ചു.
