കോവിഡ് പ്രതിരോധപ്രവർത്തനങ്ങൾക്ക് മാർഗനിർദേശം നല്കാൻ ചൈനയിൽനിന്നുള്ള പ്രത്യേക മെഡിക്കൽ സംഘം കുവൈത്തിലെത്തി. കുവൈത്ത് ആരോഗ്യമന്ത്രി ഡോ. ബാസിൽ അസ്സബാഹിന്റെ അധ്യക്ഷതയിൽ സംഘം യോഗം ചേർന്ന് സ്ഥിതി വിലയിരുത്തി. മൂന്നുദിവസം സംഘം കുവൈത്തിലുണ്ടാവും. നിരവധി ഫീൽഡ് സന്ദർശങ്ങളും ആരോഗ്യമന്ത്രാലയത്തിലെ വിദഗ്ധരുമായി ചർച്ചകളും അജണ്ടയിൽ ഉൾപ്പെടുത്തിയിട്ടുണ്ട്.
കോവിഡ് പ്രതിരോധ രംഗത്തെ അനുഭവങ്ങൾ പരസ്പരം കൈമാറും. കോവിഡ് 19 ആദ്യമായി റിപ്പോർട്ട് ചെയ്ത രാജ്യമാണ് ചൈന. ഏറെ വ്യാപനം സംഭവിച്ച അവിടെ സ്ഥിതി നിയന്ത്രണത്തിലേക്ക് കൊണ്ടുവരാൻ അധികൃതർക്ക് കഴിഞ്ഞു. ഈ അനുഭവങ്ങൾ കോവിഡ് പ്രതിരോധത്തിൽ കുവൈത്തിന് തുണയാവും. നേരത്തെ ഇന്ത്യയിൽനിന്നുള്ള മെഡിക്കൽ സംഘം കുവൈത്തിലെത്തിയിരുന്നു.
