ലോകത്ത് കോവിഡിന്റെ രൂക്ഷത കുറഞ്ഞതായി കരുതിയിരുന്ന ദക്ഷിണ കൊറിയ, ജപ്പാന്, ആസ്ട്രേലിയ, ബ്രിട്ടന്, ജര്മനി എന്നിവിടങ്ങളിലെല്ലാം രോഗം വീണ്ടും വ്യാപിക്കുന്നതായി റിപ്പോർട്ടുകൾ. നിലവിൽ ആഗോള തലത്തിൽ കോവിഡ് ബാധിതരുടെ എണ്ണം 1.80 കോടിയിലേക്ക് എത്തി. മരണ നിരക്കും അതുപോലെ ഉയരുകയാണ്. ലാറ്റിനമേരിക്കയില് മാത്രം കോവിഡ് ബാധിച്ച് മരിച്ചവരുടെ എണ്ണം രണ്ടു ലക്ഷം കവിഞ്ഞു. ബ്രസീലില് 92,568 പേരും മെക്സികോയില് 46,688 പേരും പെറുവില് 19,217 പേരും ചിലിയില് 9457 പേരും കൊളംബിയയില് 10,106 പേരും അര്ജന്റീനയില് 3543 പേരും ബൊളീവിയയില് 3000 പേരുമാണ് മരിച്ചത്. ദക്ഷിണാഫ്രിക്കയില് കോവിഡ് രോഗികളുടെ എണ്ണം അഞ്ചു ലക്ഷം പിന്നിട്ടു. ഫിലിപ്പീന്സില് കോവിഡ് ബാധിതര് ഒരു ലക്ഷമായി. ഇതോടെ ലക്ഷത്തിനു മേല് കോവിഡ് ബാധിതരുള്ള രാജ്യങ്ങള് 25 ആയി ഉയര്ന്നു.