ഫിഫ ലോകകപ്പ് ഖത്തറിൽ ആരംഭിക്കാൻ ഇനി വെറും മൂന്ന് ആഴ്ചകൾ മാത്രം. ഖത്തറിലെ കോവിഡ് നിയന്ത്രണങ്ങളിൽ വരുത്തിയ ഇളവുകൾ ആരാധകരുടെ പ്രവേശനത്തെയും എളുപ്പമുള്ളതാക്കും. നിലവിൽ ഖത്തറിൽ സന്ദർശക വിസകൾ താത്കാലികമായി നിർത്തിവച്ചിരിക്കുകയാണ്.
പുതിയ ഇളവുകൾ അനുസരിച്ച് ഖത്തറിലേക്ക് എത്തുന്നവർ ഇനി നെഗറ്റീവ് പിസിആർ അല്ലെങ്കിൽ റാപ്പിഡ് ആന്റിജൻ ടെസ്റ്റ് ഹാജരാക്കേണ്ടതില്ല. ഖത്തറിൽ പ്രവേശിക്കുന്നതിന് കോവിഡ് വാക്സിനേഷൻ സർട്ടിഫിക്കറ്റും ആവശ്യമില്ല.
ഖത്തറിലേക്ക് പോകുന്നതിന് മുമ്പ് രാജ്യത്തെ ഔദ്യോഗിക കോൺടാക്റ്റ് ട്രെയ്സിംഗ് ആപ്പായ എഹ്തെറാസിൽ മുൻകൂട്ടി രജിസ്റ്റർ ചെയ്യുന്നതും യാത്രക്കാർക്കായി ഒഴിവാക്കിയിട്ടുണ്ട്. നിലവിൽ ആരോഗ്യ പരിരക്ഷാ സൗകര്യങ്ങളിൽ പ്രവേശിക്കുന്ന വ്യക്തികൾക്ക് മാത്രമേ എഹ്തെറാസ് അപേക്ഷ നിര്ബന്ധമുള്ളൂ. മാസ്ക് നിയമങ്ങളും ലഘൂകരിച്ചിട്ടുണ്ട്, ആരോഗ്യ കേന്ദ്രങ്ങളിൽ മാത്രം ഇവ ധരിച്ചാൽ മതിയാകും.
അതേസമയം രാജ്യത്ത് എത്തുന്ന അന്താരാഷ്ട്ര ആരാധകർ ഖത്തറിലേക്ക് പ്രവേശിക്കുന്നതിന് ഹയ്യ എൻട്രി പെർമിറ്റ് കൈവശം വയ്ക്കണം, ടിക്കറ്റ് ബുക്ക് ചെയ്യുകയും ഹയ്യ കാർഡിനായി അപേക്ഷിക്കുകയും ചെയ്ത എല്ലാ ആരാധകർക്കും ഇമെയിൽ വഴി പെർമിറ്റ് സ്വന്തമാക്കാം.
ഈ എൻട്രി പെർമിറ്റ് കൈമാറ്റം ചെയ്യാവുന്നതല്ല. A4 പേപ്പറിലെ പൂർണ്ണമായ നല്ല നിലവാരമുള്ള പ്രിന്റൗട്ടായി ഇത് സാധുതയുള്ളതാണെന്നും സ്കാനിംഗ് ആവശ്യങ്ങൾക്ക് ഉപയോഗിക്കാമെന്നും ഹയ്യ എൻട്രി പെർമിറ്റിൽ വ്യക്തമാക്കിയിട്ടുണ്ട്.
ഹയ്യ എൻട്രി പെർമിറ്റ് A4 സൈസ് പെർമിറ്റാണ്, അതിൽ QR കോഡിനൊപ്പം ആരാധകന്റെ ഫോട്ടോയും പേര്, ദേശീയത, ഹയ്യ കാർഡ് നമ്പർ, താമസ കാലാവധി തുടങ്ങി എല്ലാ വിവരങ്ങളും അപ്ഡേറ്റ് ചെയ്തിരിക്കും.
