വിജ്ഞാനത്തിന്റെയും വിനോദത്തിന്റെയും ലോകോത്തര പ്രദർശനങ്ങളുമായി ഷാർജ എക്സ്പോ സെന്റർ ഈ മാസം സജീവമാകും. എക്സിബിഷൻ സീസൺ എന്നു വിശേഷിപ്പിക്കപ്പെടുന്ന വരുന്ന നാലു മാസങ്ങളിൽ 11 മേളകളാണ് ഒരുക്കിയിട്ടുള്ളതെന്ന് എക്സ്പോ സെന്റർ വാർത്തകുറിപ്പിൽ അറിയിച്ചു. ആഗസ്റ്റ് 26 മുതൽ അടുത്ത വർഷം ജനുവരി ഒന്നുവരെ നീണ്ടുനിൽക്കുന്നതാണ് പ്രദർശനങ്ങൾ. ഇവയിൽ ബിസിനസ്, വാണിജ്യം, സാംസ്കാരികം, വിദ്യാഭ്യാസം എന്നിങ്ങനെ വ്യത്യസ്തമായ വിഭാഗങ്ങളിലെ മേളകൾ ഉൾപ്പെടും.
ആഗസ്റ്റ് 26ന് ആരംഭിക്കുന്ന ‘ബാക് ടു സ്കൂൾ എക്സിബിഷ’നാണ് ആദ്യ മേള. സെപ്റ്റംബർ മൂന്നു വരെ നീണ്ടുനിൽക്കുന്ന പ്രദർശനത്തിന് ശേഷം സെപ്റ്റംബറിൽതന്നെ അന്താരാഷ്ട്ര ഗവൺമെന്റ് കമ്യൂണിക്കേഷൻ ഫോറം നടക്കും. ഒക്ടോബറിൽ വാച്ച് ആൻഡ് ജ്വല്ലറി മിഡിൽ ഈസ്റ്റ് ഷോ, ഗൾഫ് കോട്ടിങ് ഷോ, നാഷനൽ കരിയർ എക്സിബിഷൻ, അന്താരാഷ്ട്ര എജുക്കേഷൻ ഷോ എന്നിവ അരങ്ങേറും. ഒക്ടോബർ 19 മുതൽ 22 വരെ നടക്കുന്ന ലോകോത്തര വിദ്യാഭ്യാസ മേളയായ ‘അന്താരാഷ്ട്ര എജുക്കേഷൻ ഷോ’യിൽ ഇന്ത്യൻ പവലിയൻ ഒരുക്കുന്നത് ‘ഗൾഫ് മാധ്യമം’ എജു കഫേയാണ്. ഇതു സംബന്ധിച്ച കരാറിൽ എക്സ്പോ സെന്ററും ‘ഗൾഫ് മാധ്യമ’വും കഴിഞ്ഞ മാസം ഒപ്പുവെച്ചിരുന്നു.