വിമാനത്തിനുള്ളില് ഭീകരനുണ്ടെന്ന് പറഞ്ഞ് പരിഭ്രാന്തി സൃഷ്ടിച്ച യാത്രക്കാരന് അറസ്റ്റില്. ഡല്ഹിയില് നിന്നും ഗോവയിലേക്ക് പുറപ്പെട്ട എയര്ഇന്ത്യ വിമാനത്തിലാണ് സംഭവം. സിയ ഉള്ഹാഖ് എന്ന യാത്രക്കാരനെയാണ് ഗോവയിലെ ഡാബോലിം വിമാനത്താവളത്തില് വച്ച് പോലീസ് അറസ്റ്റ് ചെയ്തത്.
ഇയാള്ക്ക് മാനസികപ്രശ്നങ്ങളുണ്ടെന്ന് പിന്നീട് കണ്ടെത്തി. സ്പെഷല് സെല് ഉദ്യോഗസ്ഥനെന്ന് സ്വയം വിശേഷിപ്പിച്ച ഇയാള് വിമാനത്തില് ഭീകരനുണ്ടെന്ന് യാത്രക്കാരോട് പറയുകയായിരുന്നു. ഇതോടെ യാത്രക്കാര് എല്ലാവരും പരിഭ്രാന്തിയിലായി.
എയര്ഇന്ത്യ ജീവനക്കാരും സിഐഎസ്എഫ് ഉദ്യോഗസ്ഥരും ചേര്ന്ന് പിടികൂടിയ ഇയാളെ പിന്നീട് എയര്പോര്ട്ട് പോലീസിന് കൈമാറി. ന്യൂഡല്ഹിയിലെ ഇന്സ്റ്റിറ്റ്യൂട്ട് ഓഫ് ഹ്യൂമന് ബിഹേവിയര് ആന്ഡ് അലൈഡ് സയന്സില് ഇയാള് ചികിത്സയില് കഴിഞ്ഞിട്ടുണ്ടെന്ന് പോലീസ് കണ്ടെത്തി.