ഐ.പി.എല്ലില്‍ വെള്ളിയാഴ്ച നടന്ന മത്സരത്തില്‍ 99 റണ്‍സില്‍ ക്ലീന്‍ ബൗള്‍ഡായശേഷം ബാറ്റ് വലിച്ചെറിഞ്ഞ് അരിശം തീര്‍ത്ത കിങ്സ് ഇലവന്‍ പഞ്ചാബ് താരം ക്രിസ് ഗെയ്ലിന് പിഴയിട്ടു. പെരുമാറ്റ ചട്ടം ലംഘിച്ചതിന് മാച്ച്‌ ഫീയുടെ 10ശതമാനമാണ് പിഴയിട്ടത്.
ടീമില്‍ ഇടംപിടിച്ച ശേഷം വെള്ളിയാഴ്ച രാജസ്ഥാന്‍ റോയല്‍സിനെതിരായ മത്സരത്തില്‍ തകര്‍പ്പന്‍ പ്രകടനം കാഴ്ചവെക്കുക്കയായിരുന്നു ഗെയ്ല്‍. 99 റണ്‍സ് നേടിയ ഗെയ്ലിനെ ജോഫ്ര ആര്‍ച്ചര്‍ പുറത്താക്കി. ഇതോടെ കരീബിയന്‍ താരം ബാറ്റ് വലിച്ചെറിഞ്ഞ് ദേഷ്യം തീര്‍ക്കുകയായിരുന്നു. പെരുമാറ്റച്ചട്ടം ലംഘിച്ചതായി ഗെയ്ല്‍ സമ്മതിച്ചു.
സെഞ്ച്വറി തികക്കാനായില്ലെങ്കിലും മറ്റൊരു ചരിത്രം കുറിച്ചായിരുന്നു ഗെയ്ലിെന്‍റ മടങ്ങിപ്പോക്ക്. ട്വന്‍റി20 മത്സരത്തില്‍ 1000 സിക്സ് എന്ന നേട്ടം ഗെയ്ല്‍ സ്വന്തമാക്കുകയായിരുന്നു. ട്വന്‍റി20യില്‍ 400 മത്സരങ്ങളില്‍ 13,000 റണ്‍സ് നേടുന്ന ആദ്യ താരവുമായി ക്രിസ് ഗെയ്ല്‍. വെള്ളിയാഴ്ച നടന്ന മത്സരത്തില്‍ 63 ബാളില്‍നിന്ന് എട്ടു സിക്സുകള്‍ ക്രിസ് ഗെയ്ല്‍ നേടി.
