സേവനങ്ങൾ നിമിഷങ്ങൾക്കുള്ളിൽ പൂർത്തിയാക്കി യുഎഇയിലെ ഏറ്റവും വേഗമേറിയ സർക്കാർ വകുപ്പുകളിലൊന്നായി ദുബായിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് . ദ്രുതഗതിയിലുള്ള ഡിജിറ്റൽ ട്രാൻസ്ഫോർമേഷൻ ഡ്രൈവാണ് ഇത്തരത്തിലുള്ള മുന്നേറ്റത്തിന് പിന്നിലെന്നു ജിഡിആർഎഫ്എ-ദുബായ് ഡയറക്ടർ ജനറൽ ലഫ്. ജനറൽ- മുഹമ്മദ് അഹമ്മദ് അൽ മർറി അറിയിച്ചു. സ്മാർട് ആപ്ലിക്കേഷൻ സംവിധാനം, ഐഡന്റിറ്റി, പൗരത്വം, പാസ്പോർട്ട് രേഖകൾ എന്നിവ സ്വീകരിക്കുന്നതിനുള്ള 20 തലങ്ങളെ എല്ലാംകൂടി ഒരു ഘട്ടമായിവെട്ടിച്ചുരുക്കി.
ദുബായിൽ യുഎഇ പാസ്പോർട്ടുകൾ പുതുക്കാൻ 7 മിനിറ്റ് മതി. മുൻപ് ഈ നടപടിക്ക് എടുത്തിരുന്ന സമയം 35 മിനിറ്റായിരുന്നു. ജിഡിആർഎഫ്എ ദുബായ് ആസ്ഥാനത്തുള്ള ലോക്കൽ പാസ്പോർട്ട് വിഭാഗം സന്ദർശന വേളയിലാണ് ലഫ്. ജനറൽ ഇക്കാര്യം വെളിപ്പെടുത്തിയത്. അതേസമയം 2019 മുതൽ 2021 ഈ കാലയളവിൽ 1,28,000 ലേറെ ഇടപാടുകളാണ് സിറ്റിസൻഷിപ്പ് ആൻഡ് ഐഡന്റിറ്റി അഫേഴ്സ് ഡിപ്പാർട്ട്മെന്റ് പൂർത്തീകരിച്ചത്. പൊതുജനങ്ങൾക്കായുള്ള എല്ലാ സേവനങ്ങളും ഇമാറാത്തി പാസ്പോർട്ട് പുതുക്കൽ അഭ്യർത്ഥനകളും സ്മാർട് ആപ്ലിക്കേഷനുകൾ വഴിയോ, ദുബായ് ഇന്റർനാഷണൽ എയർപോർട്ട് ടെർമിനൽ 3-ലെ ഉപയോക്തൃ സന്തോഷകേന്ദ്രം വഴിയോ 24 മണിക്കൂറും പൂർത്തിയാക്കാമെന്ന് ജിഡിആർഎഫ്എ-ദുബായ് അറിയിച്ചു.
