യുഎഇ റസിഡന്സി വിസയുള്ളവര്ക്ക് അബൂദബി, അല്ഐന് വിമാനത്താവളങ്ങളില് ഇറങ്ങാന് നിര്ബന്ധിത ഐ.സി.എ ട്രാവല് പെര്മിറ്റ് ആവശ്യമില്ലെന്ന് അബൂദബി അന്താരാഷ്ട്ര വിമാനത്താവളം അധികൃതര് അറിയിച്ചു. ഐ.സി.എ അനുമതി ലഭിക്കാത്തതിനാല് മടക്കയാത്ര വൈകുന്ന പ്രവാസികള്ക്ക് ഏറെ ആശ്വാസം പകരുന്ന നടപടിയാണിത്.
പുതുക്കിയ യാത്രാനിയമങ്ങള് ചൊവ്വാഴ്ച മുതല് പ്രാബല്യത്തില് വരും. വിമാനക്കമ്പനികൾക്ക് അയച്ച ഔദ്യോഗിക വിജ്ഞാപനത്തിലാണ് ഇക്കാര്യം പറയുന്നത്. ഇതുസംബന്ധിച്ച ഔദ്യോഗിക പ്രഖ്യാപനം ഉടന് ഉണ്ടായേക്കും. പാക്കിസ്ഥാന് ഇന്റര്നാഷണല് എയര്ലൈന്സ് (പി.ഐ.എ), ടര്ക്കിഷ് എയര്ലൈന്, മിഡില് ഈസ്റ്റ് എയര്ലൈന് എന്നിവയുടെ ട്രാവല് ഏജന്സികള്ക്ക് ഇതുസംബന്ധിച്ച ഔദ്യോഗിക അറിയിപ്പ് ലഭിച്ചു.
എന്നാല്, എയര് ഇന്ത്യക്ക് ഇതുവരെ അറിയിപ്പ് ലഭിച്ചിട്ടില്ല. അംഗീകൃത ലബോറട്ടറിയില് നിന്നുള്ള കോവിഡ് പരിശോധന ഫലം വേണമെന്ന നിബന്ധനക്ക് മാറ്റമില്ല.