ഡ്രൈവിങ്ങിനിടെ മൊബൈല്‍ ഫോണ്‍ ഉപയോഗിക്കുന്നതിനെതിരെ കര്‍ശന മുന്നറിയിപ്പുമായി കുവൈത്ത് ആഭ്യന്തര മന്ത്രാലയം. കഴിഞ്ഞ വര്‍ഷം ഇത്തരത്തില്‍ 29,062 കേസുകള്‍ റിപ്പോര്‍ട്ട് ചെയ്തു. ഇത് മുന്‍ വര്‍ഷത്തേക്കാള്‍ കുറവാണെങ്കിലും ഇത് കര്‍ഫ്യൂവും ലോക്ഡൗണും കാരണം ഗതാഗതം ഏറെ നാള്‍ നിലച്ചിരുന്നതുകൊണ്ടാണെന്നാണ് വിലയിരുത്തല്‍. വാഹനമോടിക്കുന്നതിനിടെ മൊബൈല്‍ ഫോണ്‍ ഉപയോഗിക്കുന്നത് ഗൗരവമായാണ് കാണുന്നതെന്ന് ആഭ്യന്തര മന്ത്രാലയത്തിലെ ഗതാഗത വകുപ്പ് അസിസ്റ്റന്‍റ് അണ്ടര്‍ സെക്രട്ടറി മേജര്‍ ജനറല്‍ ജമാല്‍ അല്‍ സായിഗ് മുന്നറിയിപ്പ് നല്‍കി. പട്രോള്‍ ടീമുകള്‍ വാഹനത്തില്‍ സഞ്ചരിച്ച്‌ നിരീക്ഷിക്കുന്നതിനു പുറമെ റോഡരികില്‍ നിലയുറപ്പിച്ചും അത്യാധുനിക കാമറകള്‍ ഉപയോഗിച്ചും നിരീക്ഷണം നടത്തുന്നു. കുറ്റകൃത്യങ്ങള്‍ ശ്രദ്ധയില്‍പെടുന്നവര്‍ വാട്സ്ആപ് വഴി ഗതാഗത വകുപ്പിനെ അറിയിക്കണമെന്ന് അധികൃതര്‍ അഭ്യര്‍ഥിച്ചു.
നിയമലംഘനത്തിെന്‍റ ഫോേട്ടാ എടുത്ത് അയച്ചാല്‍ അയക്കുന്നവരുടെ സ്വകാര്യത സംരക്ഷിച്ചുതന്നെ നടപടി സ്വീകരിക്കുമെന്ന് അധികൃതര്‍ വ്യക്തമാക്കി. രാജ്യത്ത് സംഭവിക്കുന്ന വാഹനാപകടങ്ങളില്‍ വലിയൊരു ഭാഗത്തിനും കാരണമാകുന്നത് ഡ്രൈവിങ്ങിനിടെയുള്ള മൊബൈല്‍ ഫോണ്‍ ഉപയോഗമാണ്. അതിവേഗത്തില്‍ ഗതാഗതം നടക്കുന്ന റോഡുകളില്‍ ഒരു നിമിഷത്തെ അശ്രദ്ധ അപകടത്തിലേക്കു നയിക്കും. വാട്സ്ആപ് ഉപയോഗം പ്രധാന വില്ലനാകുന്നതായി ഗതാഗത വകുപ്പിന്റെ വിലയിരുത്തലുണ്ട്. അശ്രദ്ധമായി വാഹനമോടിക്കുന്നതുമായി ബന്ധപ്പെട്ട് 20,880 നിയമലംഘനങ്ങള്‍ കഴിഞ്ഞ വര്‍ഷം റിപ്പോര്‍ട്ട് ചെയ്തു.
