കോവിഡ് പശ്ചാത്തലത്തില്‍ സൗദി അറേബ്യയിലേക്ക് മടങ്ങുന്ന യാത്രക്കാര്‍ പാലിക്കേണ്ട നിബന്ധനകള്‍ എന്തെല്ലാമെന്ന് സൗദി എയര്‍ലൈന്‍സ് വ്യക്തമാക്കി. 25 രാജ്യങ്ങളില്‍ നിന്നാണ് ആദ്യഘട്ടത്തില്‍ സൗദിയിലേക്ക് വരാന്‍ അനുമതിയുണ്ടാവുക എന്ന സൂചനയോടെ ഈ രാജ്യങ്ങളില്‍ നിന്നുള്ള യാത്രക്കാര്‍ക്ക് മാത്രമായാണ് നിബന്ധന ഏര്‍പ്പെടുത്തിയിരിക്കുന്നത്.
യാത്രക്കാര്‍ ആരോഗ്യ നിബന്ധനകള്‍ പാലിക്കുമെന്ന പ്രതിജ്ഞ ഫോറം പൂരിപ്പിച്ച്‌ ഒപ്പിട്ട് നല്‍കണം. വിമാനത്താവളത്തിലെ ആരോഗ്യ നിരീക്ഷണ കേന്ദ്രത്തിലാണ് ഏല്‍പിക്കേണ്ടത്. ഏഴ് ദിവസത്തെ ഹോം ക്വാറന്‍റീന്‍ നിര്‍ബന്ധം. ആരോഗ്യ ജീവനക്കാര്‍ക്ക് ക്വാറന്‍റീന്‍ മൂന്ന് ദിവസമായിരിക്കും. ക്വാറന്‍റീന്‍ കാലാവധി അവസാനിക്കുമ്പോൾ കോവിഡ് പരിശോധനക്ക് വിധേയമാകുകയും ഫലം നെഗറ്റീവാവുകയും വേണം.
യാത്രക്കാരുടെ മൊബൈല്‍ ഫോണുകളില്‍ തത്മന്‍, തവക്കല്‍ ആപ്ലിക്കേഷനുകള്‍ ഇന്‍സ്റ്റാള്‍ ചെയ്തിരിക്കണം. രാജ്യത്തേക്ക് പ്രവേശിച്ചാല്‍ എട്ട് മണിക്കൂറിനുള്ളില്‍ ‘തത്മന്‍’ ആപ് വഴി വീട് സ്ഥിതി ചെയ്യുന്ന സ്ഥലം നിര്‍ണയിക്കണം. കോവിഡ് ലക്ഷണം വല്ലതും അനുഭവപ്പെടുന്നവര്‍ ഉടനെ 937 നമ്ബറില്‍ ബന്ധപ്പെടുകയോ അടിയന്തിര കേസുകളില്‍ അടുത്ത ആരോഗ്യ കേന്ദ്രത്തിലേക്ക് പോകുകയോ വേണം.
