റഷ്യയുടെ കൊറോണ വാക്സിന് സ്പുട്നിക് 95 ശതമാനവും ഫലപ്രദമെന്നു നിര്‍മാതാക്കള്‍. പരീക്ഷണത്തില്‍നിന്നും ലഭിച്ച വിവരങ്ങളുടെ ഇടക്കാല വിശകലനത്തെ അടിസ്ഥാനമാക്കിയാണു വാക്സിന് ഫലപ്രദമെന്ന കണ്ടെത്തലില്‍ എത്തിയതെന്നാണു റഷ്യ അറിയിച്ചിരിക്കുന്നത്.
ആദ്യ ഡോസ് നല്‍കിയതിന് ശേഷം അടുത്ത 42 ദിവസങ്ങളില്‍ ശേഖരിച്ച വിവരങ്ങളാണ് അധികൃതര്‍ വിശകലനത്തിന് വിധേയമാക്കിയത്. കൂടുതല്‍ ഫലപ്രദമാണെന്ന് കണ്ടെത്തിയതോടെ പൊതുവിപണിയില്‍ ലഭ്യമാക്കാനുള്ള നടപടികളും നിര്‍മ്മാതാക്കള്‍ ആരംഭിച്ചിട്ടുണ്ട്.
പരീക്ഷണത്തിന്‍റെ ഭാഗമായ 18,794 പേരില്‍ 39 പേര്‍ക്ക് മാത്രമാണ് കോവിഡ് സ്ഥിരീകരിച്ചത്. പരീക്ഷണം നടത്തിയവരില്‍ 28 ദിവസത്തിനുശേഷം ഫലം വിലയിരുത്തിയപ്പോള്‍ 91.4 ശതമാനവും 42 ദിവസത്തിനുശേഷം വിലയിരുത്തിയപ്പോള്‍ 95 ശതമാനവും ഫലപ്രദമാണെന്നു കണ്ടെത്തിയതായും റഷ്യന്‍ ഡയറക്‌ട് ഇന്‍വെസ്റ്റ്മെന്‍റ് തലവന്‍ പറഞ്ഞു.
