അബൂദബി: കോടതി വ്യവഹാരങ്ങളില്‍ ഇടപെടുമ്പോള്‍ നല്‍കേണ്ട ഫീസ് അടക്കാന്‍ സ്മാര്‍ട്ട് സേവനം ഒരുക്കി അബൂദബി ജുഡീഷ്യല്‍ ഡിപ്പാര്‍ട്മെന്‍റ് (എ.ഡി.ജെ.ഡി). അബൂദബി ഇസ്‍ലാമിക് ബാങ്കിന്‍റെ (എ.ഡി.ഐ.ബി) സഹകരണത്തോടെ സ്മാര്‍ട്ട് ആപ്പിലൂടെ ഇനി ഫീസടക്കാം. കോടതി നടപടികള്‍ക്കായി വ്യക്തികള്‍ക്ക് എ.ഡി.ഐ.ബി അക്കൗണ്ടില്‍നിന്ന് നേരിട്ട് കോടതിയുടെ അക്കൗണ്ടിലേക്ക് പണം കൈമാറാം. ഫീസ് അടക്കാന്‍ സ്മാര്‍ട്ട് സംവിധാനംകൂടി സജ്ജമായതോടെ കോടതി നടപടികള്‍ മുഴുവന്‍ ഓണ്‍ലൈന്‍ വഴിയാകുമെന്ന് ജുഡീഷ്യല്‍ ഡിപ്പാര്‍ട്മെന്‍റ് അണ്ടര്‍ സെക്രട്ടറി യൂസഫ് സയീദ് അല്‍ അബ്രി പറഞ്ഞു. കൂടുതല്‍ ബാങ്കുകളെ ഉള്‍പ്പെടുത്തി സേവനം വിപുലപ്പെടുത്തും. പുതിയ സേവനത്തിലൂടെ സമയവും കോടതി ജീവനക്കാരുടെ ജോലിഭാരവും കുറക്കാനാവുമെന്നും അദ്ദേഹം പറഞ്ഞു.
