ഈ വർഷാവസാനം നടക്കേണ്ട ട്വൻറി20 ലോകകപ്പിന്റെ അന്തിമവിധിക്കായി ഒരു മാസംകൂടി കാത്തിരിക്കാൻ രാജ്യാന്തര ക്രിക്കറ്റ് കൗൺസിൽ. ബുധനാഴ്ച ചേർന്ന ബോർഡ് യോഗമാണ് അന്തിമ തീരുമാനം അടുത്തമാസത്തേക്കു മാറ്റിവെച്ചത്. കോവിഡ് പശ്ചാത്തലത്തിൽ ലോകസാഹചര്യങ്ങൾ വിലയിരുത്തിയ ശേഷം മാത്രം തീരുമാനമെടുക്കാമെന്ന് ഐ.സി.സി ചീഫ് എക്സിക്യൂട്ടിവ് മനു സ്വാഹ്നി അറിയിച്ചു.
‘‘ഒരു തീരുമാനം മാത്രമാണ് ആഗ്രഹിക്കുന്നത്. എന്നാൽ, അത് ഏറ്റവും കൃത്യമായതായിരിക്കണം. കാത്തിരുന്നാലും, ശരിയായ തീരുമാനമാവും എടുക്കുന്നത്’’ – അദ്ദേഹം പറഞ്ഞു. ഒക്ടോബർ – നവംബർ മാസത്തിൽ ആസ്ട്രേലിയയിലാണ് ട്വൻറി20 ലോകകപ്പ് നിശ്ചയിച്ചത്. വിവിധ ക്രിക്കറ്റ് ബോർഡുകൾ, ടി.വി സംപ്രേഷകർ എന്നിവരുമായി ചർച്ച ചെയ്താവും അന്തിമ തീരുമാനം.