അബൂദബിയിൽ കോവിഡ് നിയന്ത്രണങ്ങളിൽ ഇളവ് നൽകി. വാക്സിനെടുക്കാത്തവർക്കും ഇനി മുതൽ പൊതുസ്ഥലങ്ങളിൽ പ്രവേശിക്കാം. എന്നാൽ, 48 മണിക്കൂറിനുള്ളിലെടുത്ത നെഗറ്റീവ് പി.സി.ആര്‍ ഫലം വേണമെന്ന നിബന്ധനയിൽ മാറ്റമില്ല. അബൂദബി ദുരന്ത നിവാരണ സമിതിയാണ് ഇക്കാര്യം അറിയിച്ചത്. ഇളവ് വ്യാഴാഴ്ച മുതല്‍ പ്രാബല്യത്തിൽ വന്നു.
മുൻപ് വാക്‌സിനേഷന്‍ എടുത്തവർക്ക് മാത്രമേ അല്‍ ഹുസ്ൻ ആപ്പിലെ ഗ്രീന്‍ പാസ് ഉപയോഗിച്ച് ഇവന്‍റുകള്‍, വിനോദസഞ്ചാര കേന്ദ്രങ്ങള്‍, സാംസ്‌കാരിക കേന്ദ്രങ്ങള്‍, സിനിമാശാലകള്‍, ജിമ്മുകള്‍ തുടങ്ങിയ വേദികളില്‍ പ്രവേശിക്കാന്‍ അനുവാദമുണ്ടായിരുന്നുള്ളു. വാക്‌സിനേഷന്‍ പൂർത്തിയാക്കാത്തവർക്ക് സൂപ്പര്‍മാര്‍ക്കറ്റുകളിലും ഫാര്‍മസികളിലും മാത്രമേ പ്രവേശിക്കാന്‍ കഴിയൂ എന്ന് അധികൃതര്‍ വ്യക്തമാക്കിയിരുന്നു. ഈ നിര്‍ദേശമാണ് പുതുക്കിയത്.
