വെള്ളിയാഴ്ച ഖത്തറിൽ 1153 പേർക്കുകൂടി കോവിഡ് സ്ഥിരീകരിച്ചു. നിലവിൽ ചികിൽസയിലുള്ളവർ 25,865 ആയി. 190 പേർക്കുകൂടി രോഗം ഭേദമായി. ആകെ രോഗം ഭേദമായവർ 3546 ആയി. ആകെ 1,48,173 പേർക്ക് പരിശോധന നടത്തിയപ്പോൾ 29,425 പേരിലാണ് ആകെ രോഗബാധ കണ്ടെത്തിയത്. മരിച്ചവരും രോഗം ഭേദമായവരും ഉൾപ്പെടെയാണിത്.
ഖത്തറിൽ 504 രോഗികളെ ഒരേ സമയം കിടത്തി ചികിത്സിക്കാൻ കഴിയുന്ന പുതിയ ഫീൽഡ് ആശുപത്രി കൂടി തുറന്നു പ്രവർത്തനമാരംഭിച്ചു. അൽ ശഹാനിയ–ദുഖാൻ റോഡിന് സമീപം ലിബ്സിയർ ഫീൽഡ് ആശുപത്രിയാണ് നിലവിലെ ഫീൽഡ് ആശുപത്രികൾക്ക് പിന്തുണ നൽകുന്നതിന്റെ ഭാഗമായി പ്രവർത്തനമാരംഭിച്ചിരിക്കുന്നത്.
മൂന്ന് കെട്ടിടങ്ങളിലായി ബാത്ത് റൂം സൗകര്യമുള്ള 504 സിംഗിൾ റൂമുകളാണ് ആശുപത്രിക്കുള്ളത്. പ്രധാനമായും രാജ്യത്തെ വിദേശികളുടെ ചികിത്സക്കായി നിർമിച്ച ആശുപത്രിയിൽ നിലവിൽ നൂറോളം രോഗികൾ ചികിത്സയിലുണ്ടെന്നും രോഗമുക്തരായിക്കൊണ്ടിരിക്കുകയാണെന്നും ആശുപത്രിയിലെ ക്ലിനിക്കൽ ലീഡ് ഡോ. അബ്ദുല്ല റഷീദ് അൽ നഈമി പറഞ്ഞു.
