സ്വകാര്യ ക്ലിനിക്കിലെ ലാബ് ടെക്നീഷ്യന് കോവിഡ് സ്ഥിരീകരിച്ചതോടെ പ്രദേശം സമൂഹവ്യാപന ആശങ്കയിൽ. ചീക്കോട് സ്വദേശിനിയായ 26കാരിക്കാണ് വെള്ളിയാഴ്ച രോഗം സ്ഥിരീകരിച്ചത്. ആരോഗ്യ വകുപ്പിന്റെ നിര്ദേശപ്രകാരം ലാബ് താല്ക്കാലികമായി അടച്ചു. ക്ലിനിക്കിലെ ഡോക്ടറടക്കം ആറ് ജീവനക്കാരോടും ജൂലൈ അഞ്ച് മുതല് 16 വരെ ക്ലിനിക്കിലെത്തിയവരോടും നിരീക്ഷണത്തില് കഴിയാന് ആരോഗ്യ വകുപ്പ് നിര്ദേശം നല്കി. ആദ്യദിവസം 260 പേരെ കണ്ടെത്തുകയും ഇവരോട് വീടുകളില് സ്വയം നിരീക്ഷണത്തില് കഴിയാന് നിര്ദേശിക്കുകയും ചെയ്തു. എന്നാൽ 400 ൽ അധികം പേർ സമ്പർക്കം പുലർത്തിയിട്ടുണ്ട് എന്നാണ് ആരോഗ്യ വകുപ്പിൽ നിന്നുള്ള പുതിയ വിവരം.