അബുദാബിയിൽ സ്വകാര്യ സ്കൂളുകളിലെ എല്ലാ വിദ്യാർത്ഥികളെയും അധ്യാപകരെയും അഡ്മിനിസ്ട്രേറ്റീവ് സ്റ്റാഫിനെയും സെപ്റ്റംബറിൽ പുതിയ അധ്യയന വർഷത്തേക്ക് കാമ്പസുകളിലേക്ക് മടങ്ങുന്നതിന് മുമ്പ് കോവിഡ് -19 ടെസ്റ്റ് നടത്തണം എന്ന് അബുദാബി വിദ്യാഭ്യാസ-വിജ്ഞാന വകുപ്പ് (അഡെക്) സ്ഥിരീകരിച്ചു. ഈ നയം എല്ലാ യുഎഇ സ്കൂളുകളിലും കോളേജുകളിലും ബാധകമാകും. കവറേജ്, ഷെഡ്യൂളുകൾ, എന്നിവ സംബന്ധിച്ച വിശദാംശങ്ങൾ അധികാരികളുമായി ചേർന്ന് പിന്നീട് പ്രഖ്യാപിക്കും.
സെപ്റ്റംബറിൽ വീണ്ടും തുറക്കാൻ അനുമതി നൽകിയ ശേഷം സ്കൂളുകളിലേക്ക് ഇത് സംബന്ധിച്ച് സർക്കുലർ അയച്ചു കഴിഞ്ഞു. കോൺടാക്റ്റ്-ട്രെയ്സിംഗിനായി സ്റ്റാഫ്, രക്ഷകർത്താക്കൾ, വിദ്യാർത്ഥികൾ എന്നിവരും അൽഹോസ്ൻ അപ്ലിക്കേഷൻ ഡൗൺലോഡു ചെയ്യേണ്ടതുണ്ട്. കൂടാതെ സമീപകാല യാത്രാ ചരിത്രം അറിയിക്കുകയും വേണം. 12 വയസ്സിന് മുകളിലുള്ള വിദ്യാർത്ഥികൾക്കും സ്കൂൾ പരിസരത്ത് പ്രവേശിക്കുന്നവർക്കും മാസ്ക്കുകൾ നിർബന്ധമായിരിക്കും.