യാത്രക്കാര്‍ക്ക് പുതിയ കോവിഡ് പ്രോട്ടോകോളുമായി ദുബായ് സുപ്രീം കമ്മിറ്റി ഫോര്‍ ക്രൈസിസ് ആന്‍ഡ് ഡിസാസ്റ്റര്‍ മാനേജ്മെന്‍റ്. ദുബായില്‍ നിന്ന് നാട്ടിലേക്കു പോകുന്നവര്‍ക്ക് കോവിഡ് പരിശോധന നിര്‍ബന്ധമാക്കി അധികൃതര്‍.
നേരത്തെ ദുബായിലേക്കു വരുന്നവര്‍ക്കു മാത്രമായിരുന്നു നിര്‍ബന്ധിത കോവിഡ് പരിശോധന. നാട്ടില്‍ നിന്ന് വരുന്നവര്‍ 96 മണിക്കൂറിനുള്ളില്‍ കോവിഡ് പരിശോധന നടത്തണമെന്ന നിര്‍ദേശം 72 മണിക്കൂറായി കുറച്ചു. ജനുവരി 31 മുതലാണ് പുതിയ നിയമം നിലവില്‍ വരുക.
അതെ സമയം നിലവില്‍ ദുബായ് വിമാനത്താവളത്തില്‍ എത്തുന്നവരെ കോവിഡ് പരിശോധനക്ക് വിധേയമാക്കുന്നുണ്ട്. സൗജന്യമായാണ് ഈ പരിശോധന. പരിശോധന ഫലം വരുന്നതുവരെ മാത്രമാണ് ക്വാറന്‍റീനില്‍ കഴിയേണ്ടത്. കോവിഡ് കേസുകള്‍ ഉയരുന്ന പശ്ചാത്തലത്തിലാണ് അധികൃതരുടെ തീരുമാനം.
