നീണ്ട പോരാട്ടത്തിനൊടുവിൽ കോവിഡ് -19നെ പൗളോ ഡിബാല കീഴടക്കി. അർജൻറീന താരമായ ഡിബാല കോവിഡ് മുക്തനായ സന്തോഷ വാർത്ത ഇറ്റാലിയൻ ചാമ്പ്യൻമാരായ യുവൻറസാണ് പ്രസ്താവനയിലൂടെ ആദ്യം പങ്കുവെച്ചത്.
ഇരട്ട ടെസ്റ്റ് നടത്തിയ താരത്തിൻെറ ഫലം നെഗറ്റീവാണെന്നും ഡിബാല ഇനി ഐസൊലേഷനിൽ തുടരേണ്ടതില്ലെന്നും ക്ലബ് വ്യക്തമാക്കി. തൊട്ടുപിന്നാലെ സമൂഹമാധ്യമങ്ങളിലൂടെ ഡിബാലയും വാർത്ത സ്ഥിരീകരിച്ചു. ജീവിതം ദുഷ്കരമായ വേളയിൽ പിന്തുണച്ച എല്ലാവർക്കും നന്ദി അറിയിച്ച ഡിബാല മഹാമാരിയുടെ കെടുതി അനുഭവിക്കുന്നവർക്കൊപ്പമാണ് തൻെറ മനസെന്നും ട്വിറ്ററിൽ കുറിച്ചു. രോഗമുക്തി നേടിയ സന്തോഷവാനായിരിക്കുന്ന ചിത്രം ഇൻസ്റ്റഗ്രാമിലൂടെ പങ്കുവെക്കുകയും ചെയ്തു.
മാർച്ച് പകുതിയോടടുത്ത് രോഗം സ്ഥിരീകരിച്ച ഡിബാലയുടെ പരിശോധനാ ഫലം ആഴ്ചകൾക്ക് ശേഷവും പോസിറ്റീവായി തുടർന്നത് ആശങ്ക സൃഷ്ടിച്ചിരുന്നു. ഡിബാലക്കൊപ്പം രോഗം പിടിപ്പെട്ട മറ്റ് രണ്ട് യുവൻറസ് താരങ്ങളായ ഡാനിയേൽ റുഗാനിയും ബ്ലെയ്സ് മറ്റ്യൂഡിയും നേരത്തെ തന്നെ രോഗമുക്തി നേടിയിരുന്നു.