റിയാദ് : എക്സിറ്റ് റീ എൻട്രി, എക്സിറ്റ് വിസകളുള്ളവർക്ക് തങ്ങളുടെ രാജ്യങ്ങളിലേക്ക് മടങ്ങാൻ സൗദി ആഭ്യന്തര മന്ത്രാലയം ‘ഔദ’ എന്ന പേരിൽ പുതിയ സംവിധാനമൊരുക്കി. തീർത്തും ഒഴിച്ചു കൂടാനാവാത്ത സാഹചര്യത്തിൽ നാട്ടിൽ പോകണമെന്നുള്ളവർക്ക് ഉപയോഗിക്കാനുള്ള സംവിധാനമാണിത്. സൽമാൻ രാജാവിന്റെ നിർദേശത്തെ തുടർന്നാണ് ഇൗ പദ്ധതിക്ക് തുടക്കം കുറിച്ചത്. ഇതിൽ അപേക്ഷിക്കേണ്ടത് ജവാസത്തിെൻറ ‘അബ്ഷിർ’ വഴിയാണ്. വിവിധ വകുപ്പുകളുടെ സഹകരണത്തോടെയാണ് ഈ സംവിധാനമെന്നും മന്ത്രാലയവൃത്തങ്ങൾ പറഞ്ഞു. അപേക്ഷ കിട്ടിയാൽ അത് പരിശോധിച്ച് യാത്രക്കുള്ള നടപടി സ്വീകരിക്കും. അപേക്ഷ സ്വീകരിച്ചാൽ യാത്രയുടെ തിയതി, ടിക്കറ്റ് നമ്പർ, ബുക്കിങ് വിവരങ്ങൾ എന്നിവ വ്യക്തമാക്കി കൊണ്ടുള്ള സന്ദേശം അപേക്ഷകന്റെ മൊബൈൽ നമ്പറിൽ ലഭിക്കും. ഇതനുസരിച്ച് അപേക്ഷകന് യാത്രക്കുള്ള ഒരുക്കങ്ങൾ നടത്താം.