ദുബായ് : യുഎഇ യിൽ ഇന്ന് 254 പേർക്ക് കൂടി രോഗം സ്ഥിരീകരിച്ചു. രാജ്യത്ത് മൊത്തം രോഗബാധിതരുടെ എണ്ണം ഇതോടെ 61,606 ആയി. ഇന്ന് 2 പേർ മരണപ്പെട്ടു. ഇതോടെ രാജ്യത്തെ മരണസംഖ്യ 353 ആയി. അതേ സമയം 353 പേർക്ക് രോഗം പൂർണമായും ഭേദമായി. രാജ്യത്ത് രോഗമുക്തി നേടിയവരുടെ എണ്ണം ഇതോടെ 55,385 ആയി.
യുഎഇയിലേക്കുള്ള യാത്രക്കാർക്ക് അവരുടെ രാജ്യത്തിന്റെ സർക്കാർ അംഗീകാരമുള്ള ലാബുകളിൽ നിന്ന് കോവിഡ് -19 ടെസ്റ്റ് നടത്താമെന്ന് നാഷണൽ എമർജൻസി ക്രൈസിസ് ആൻഡ് ഡിസാസ്റ്റർ മാനേജ്‌മെന്റ് അതോറിറ്റി അറിയിച്ചു. മുമ്പ്, യുഎഇ അംഗീകൃത ലാബുകളിൽ നിന്ന് തന്നെ യാത്രക്കാർക്ക് കോവിഡ് -19 നെഗറ്റീവ് പി‌സി‌ആർ പരിശോധന ഫലം ആവശ്യമായിരുന്നു. യാത്ര പുറപ്പെടുന്ന 96 മണിക്കൂറിനുള്ളിൽ പരിശോധന നടത്തിയിരിക്കണമെന്ന് അതോറിറ്റി അറിയിച്ചു. രാജ്യത്തേക്ക് പോകുന്നതിന് യാത്രക്കാർക്ക് കോവിഡ്-നെഗറ്റീവ് ഫലം ഉണ്ടായിരിക്കണം.
യു‌എഇയിലേക്ക് പോകുന്നതിന് ഐ‌സി‌എ അംഗീകാരം ആവശ്യമാണെന്നും അതോറിറ്റി ജീവനക്കാരെ ഓർമ്മിപ്പിച്ചു. ദുബായ് നിവാസികൾക്ക് ജനറൽ ഡയറക്ടറേറ്റ് ഓഫ് റെസിഡൻസി, ഫോറിനേഴ്‌സ് അഫയേഴ്‌സിന്റെ അനുമതി ആവശ്യമാണ്. ഓഗസ്റ്റ് 1 മുതലാണ് യുഎഇ കോവിഡ്-നെഗറ്റീവ് ഫലം യാത്രക്കാർക്ക് നിർബന്ധമാക്കിയത്. വിനോദസഞ്ചാരികളും താമസക്കാരും ആരോഗ്യ പ്രഖ്യാപന ഫോം പൂരിപ്പിച്ച് കോൺടാക്റ്റ് ട്രേസിംഗ് ആപ്ലിക്കേഷൻ അൽഹോസ്ൻ ഡൗൺലോഡ് ചെയ്യുകയും വേണം.
യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയും ആയ ഷെയ്ഖ് മുഹമ്മദ് ബിൻ റാഷിദ് അൽ മക്തൂം ലെബനാൻ ജനതക്ക് അനുശോചനം രേഖപ്പെടുത്തി. അവർക്ക് ക്ഷമയും ആശ്വാസവും നൽകണമെന്ന് ദൈവത്തോട് പ്രാർത്ഥിച്ചുകൊണ്ട് ട്വിറ്ററിൽ ആണ് അദ്ദേഹം സന്ദേശം പോസ്റ്റ് ചെയ്തത്. യുഎഇ വിദേശകാര്യ സഹമന്ത്രി ഡോ. അൻവർ മുഹമ്മദ് ഗർഗാഷും ലെബനൻ ജനതയെ സംരക്ഷിക്കാനും അവരുടെ മുറിവുകൾ സുഖപ്പെടുത്താനും പ്രാർത്ഥന നടത്തി അനുശോചനം രേഖപ്പെടുത്തി. ഇന്നലെ വൈകിട്ടാണ് ബെയ്റൂട്ടിൽ ഉഗ്രസ്ഫോടനം നടന്നത്.
