യുഎഇയിലെ റെസ്റ്റോറന്റുകളും കഫേകളും ഉപഭോക്താക്കളിൽ നിന്ന് ഓൺലൈനിലൂടെ നേരിട്ട് ഓർഡറുകൾ സ്വീകരിക്കുവാനുള്ള കാമ്പെയ്ൻ ആരംഭിക്കുന്നു. നിലവിലുള്ള ഫുഡ് ഓർഡർ& ഡെലിവറി പോർട്ടലുകളായ സോമാറ്റോ, തലാബാറ്റ് അടക്കമുള്ള സേവന ദാതാക്കളോടുള്ള ആശ്രയം കുറയ്ക്കുന്നതിനുള്ള ആദ്യ നടപടിയാണ് ഈദ് വേളയിൽ പ്രാരംഭം കുറിച്ച ‘ഡയറക്ട് ടു കൺസ്യൂമർ’ കാമ്പയിൻ. ഉപഭോക്താക്കളോട് നേരിട്ട് ബുക്കിംഗ് ചെയ്യുവാനും ഡെലിവറി നൽകുവാനും എമിറേറ്റിലെ നിരവധി റെസ്റ്റോറന്റുകളും കഫേകളും തുടക്കം കുറിച്ചു.
ഓർഡറുകൾ നൽകാനും ബില്ലിൽ ലാഭം നേടുവാനും ഉപഭോക്താക്കളെ ബോധവൽക്കരിച്ചു കൊണ്ട് ഈ കാമ്പെയ്ൻ അടുത്ത കുറച്ച് ദിവസത്തേക്ക് തുടരുന്നതോടു കൂടി യു.എ.ഇയിലെ ഭൂരിഭാഗം ഫുഡ് & ബിവറേജസ് ബിസിനസുകളും സ്വന്തം അപ്ലിക്കേഷൻ വഴി സേവനം നൽകും. നിലവിൽ 50-ലധികം എഫ് & ബി ബിസിനസുകൾ അവരുടെ ‘നിങ്ങളുടെ അയൽപക്കത്തെ സഹായിക്കുക’ കാമ്പെയ്ൻ സമാരംഭിച്ചു. ഇനിയും കൂടുതൽ റെസ്റ്റോറന്റ് ശൃംഖലകൾ ഇതിൽ അംഗങ്ങളാകുമെന്നാണ് പ്രതീക്ഷിക്കുന്നത്.
“കോവിഡ് -19 ബാധിച്ച ഈ അന്തരീക്ഷത്തിൽ റെസ്റ്റോറന്റുകൾക്ക് അതിജീവിക്കാനുള്ള ഏക മാർഗം ഡെലിവറി ചാർജുകൾ ഈടാക്കുന്ന പോർട്ടലുകളിൽ നിന്നുള്ള സേവനങ്ങൾ ഉപേക്ഷിക്കുക എന്നുള്ളതാണ്,” ഒരു റെസ്റ്റോറന്റ് ഉടമ പ്രതികരിച്ചത് അങ്ങനെയാണ്. “ഉപഭോക്താകൾ ഞങ്ങളിലേക്ക് നേരിട്ട് വരുന്നതിലൂടെ ഡെലിവറി പോർട്ടലുകൾക്ക് നൽകേണ്ടി വരുന്ന ചിലവ് അവർക്ക് ലാഭിക്കാൻ കഴിയുമെന്ന് ഓർഡർ ചെയ്യുന്ന ഉപഭോക്താക്കളോട് പറയുക എന്നതാണ് അതിനുള്ള മാർഗം. ഇതുവഴി ബില്ലിന്റെ 8-15 ശതമാനം വരെ ലാഭിക്കാം എന്നു ഞങ്ങൾ അവരെ മനസിലാക്കികൊടുക്കും, ദുബായിലെ റെസ്റ്റോറന്റുകൾക്ക് ഭൂരിഭാഗം ഓർഡറുകളും നേരിട്ട് നിറവേറ്റാൻ കഴിയുമെങ്കിൽ, ഉപഭോക്താക്കളുടെ ബില്ലിൽ ഞങ്ങൾക്ക് ആ വ്യത്യാസം വരുത്താൻ കഴിയും.”എന്ന് കാമ്പയിനിൽ പങ്കെടുക്കുന്ന റെസ്റ്റോറന്റ് ഉടമകൾ അവകാശപ്പെടുന്നു.
കാമ്പയിനു പിറകിൽ….
കോവിഡ് -19 പൊട്ടിപ്പുറപ്പെട്ടതിനു ശേഷമുള്ള സാമൂഹ്യ അരക്ഷിതാവസ്ഥയും ലോക്ഡൗണുകളും ഏറ്റവും കൂടുതൽ ബാധിച്ചത് എഫ് & ബി മേഖലയെയാണ്. കഴിഞ്ഞ ആഴ്ചകളിൽ, റെസ്റ്റോറന്റുകളും കഫേകളും ഭക്ഷ്യ പോർട്ടലുകളോട് അവരുടെ കമ്മീഷൻ ഘടനകൾ കുറയ്ക്കുന്നതിന് ആവർത്തിച്ചുള്ള അഭ്യർത്ഥനകൾ നടത്തിയിരുന്നു. മിക്കപ്പോഴും ഇൻവോയ്സിന്റെ 30 ശതമാനമോ അതിൽ കൂടുതലോ എത്തിച്ചേരാവുന്ന കമ്മീഷൻ ഘടനയിൽ എന്തെങ്കിലും തരത്തിലുള്ള വെട്ടിക്കുറവുകൾ നടത്തിയില്ലെങ്കിൽ അത് റെസ്റ്റോറന്റ് ബിസിനസിനെ മോശമായി ബാധിക്കുമെന്ന സൂചനയായിരുന്നു. അതുപോലെ തന്നെ ഫുഡ് ആന്റ് ബിവറേജ് ഓപ്പറേറ്റർമാർ വാടക കുറയ്ക്കുന്നതിനായി ഭൂവുടമകളുമായി നടത്തിയ ചർച്ചയിലും കാര്യമായ പുരോഗതി കൈവരിച്ചിട്ടില്ല. ആയതിനാൽ തന്നെ റെസ്റ്റോറന്റുകൾക്ക് നേരിട്ടുള്ള ഓർഡറുകൾ ഉപയോഗിച്ച് മാത്രമേ നിലനിൽപ്പ് സാധ്യമാവൂ എന്നും 30-35 ശതമാനം വരുന്ന അഗ്രഗേറ്റർ ഫീസ് നൽകുന്നത് തുടരാനാവില്ല എന്നും പറഞ്ഞു കൊണ്ടാണ് എഫ് & ബി ഉടമകൾ പുതിയ ബിസിനസ് രീതിയിലേക്കുള്ള കാമ്പയിനിൽ പങ്കെടുക്കുന്നത്. ആദ്യ ദിവസങ്ങളിൽ തന്നെ പൊതുജനങ്ങൾ അവരുടെ അയൽപക്ക റെസ്റ്റോറന്റുകൾക്ക് വളരെയധികം പിന്തുണ നൽകുന്നതായും ഓഫ്‌ലൈൻ ഓർഡറുകൾ 30 ശതമാനം വരെ വർദ്ധിച്ചതായും ഉടമകൾ റിപ്പോർട്ട് ചെയ്യുന്നു. ഓൺലൈനിലൂടെയുള്ള ഭക്ഷ്യ വ്യാപാരം ഇപ്പോൾ ഒരു ആഗോള പ്രവണതയാണ്, ഭാവിയിലും ഇത് തുടരും എന്നാണ് സൂചന.
എന്തു കൊണ്ട് റെസ്റ്റോറന്റുകൾ ഓൺലൈൻ ബിസിനസ്സിലേക്ക്?
- ഡെലിവറി പോർട്ടലുകളെ ഒഴിവാക്കിയാലുള്ള സാമ്പത്തിക ലാഭം
ഡയറക്റ്റ്-ടു-കൺസ്യൂമർ കാമ്പെയ്ൻ വഴി റെസ്റ്റോറന്റ് ബിസിനസുകൾ മുഴുവൻ ഡെലിവറി പോർട്ടലുകളുമായുള്ള എല്ലാ ബന്ധങ്ങളും വെട്ടിക്കുറയ്ക്കും. കോവിഡ് പ്രതിസന്ധികൾക്കിടയിലെ അതിജീവനത്തെക്കുറിച്ചാണ് ഇപ്പോൾ ഫുഡ് & ബിവറേജ് ബിസിനസുകളുടെ ശ്രദ്ധ. “ ജൂൺ 1 മുതൽ നേരിട്ടുള്ള ഓർഡറുകളിൽ ശ്രദ്ധ കേന്ദ്രീകരിക്കുന്നു, ഇപ്പോൾ നില നിൽക്കാനുള്ള ഏറ്റവും മികച്ചതും സുരക്ഷിതവുമായ മാർഗ്ഗം ഇതാണ്. എങ്കിലും ഞങ്ങളുടെ ഓൺലൈൻ ഓർ‌ഡറിംഗിലേക്കും ടെലി ഓർ‌ഡറുകളിലേക്കും ട്രാഫിക് എത്തിക്കുന്നതുവരെ ചുരുങ്ങിയത് അടുത്ത രണ്ട് മൂന്ന് മാസത്തേക്ക് ഡെലിവറി പോർട്ടലുകളെ ആശ്രയിക്കാതിരിക്കാൻ ഞങ്ങൾ ഉദ്ദേശിക്കുന്നില്ല.”- ലിറ്റിൽ ഇറ്റലി മാനേജിംഗ് ഡയറക്ടർ അൻ‌മോൾ മേത്തയുടെതാണ് വാക്കുകൾ. “
- ഡെലിവറി പോർട്ടലുകളുടെ കർശന നിബന്ധനകൾക്ക് വിധേയരാകേണ്ടതില്ല
ഒരു ഓർഡറിന് കമ്മീഷനായി 30-35 ശതമാനം അധികമാണെന്നും ഓർഡറിൽ സംഭവിക്കാനിടയുള്ള കാലതാമസത്തിന് റെസ്റ്റോറന്റുകൾക്ക് മേൽ ചുമത്തുന്ന പിഴ തുടങ്ങിയവ ഏകപക്ഷീയമായ ശിക്ഷാ നടപടികൾ ആണെന്നും ഈ നിരക്കുകൾ സ്വീകാര്യമല്ലെന്നും ഫുഡ് & ബിവറേജ് ഔട്‍ലെറ്റുകൾ വ്യക്തമാക്കുന്നു. ഉപഭോക്തൃ പരാതി ആരോപണങ്ങളുടെ അടിസ്ഥാനത്തിൽ ആണെങ്കിൽ, അത് പരിഹരിക്കാനുള്ള അവസരം നൽകുകയാണ് വേണ്ടതെന്നും റെസ്റ്റോറന്റ് ഉടമകൾ പറയുന്നു. ആയതിനാൽ ഇനി മുതൽ അത്തരം ചാർജുകളിൽ നിന്നും ഒഴിവാകാൻ ഓൺലൈൻ ഓർഡർ & ഡെലിവറി ആണ് അഭികാമ്യം എന്നും ഉടമകൾ സൂചിപ്പിക്കുന്നു.
ഓൺലൈൻ ബിസിനസ്സ് ഈ മേഖലയിൽ എളുപ്പമാണോ?
ജൂൺ മുതൽ ഉപഭോക്താക്കളിലേക്ക് നേരിട്ട് ബിസിനസ് ചെയ്യുന്ന ക്യാമ്പയിൻ നടത്തുകയും സ്റ്റോക്ക് എടുക്കുകയും ചെയ്യുക എന്നതാണ് പദ്ധതി. ഈ കാമ്പെയ്‌നുകൾ നടത്തുന്ന എഫ് & ബി ബിസിനസുകൾക്ക് ഈ കാലയളവിൽ ഫുഡ് ഓർഡർ ആൻഡ് ഡെലിവറി പോർട്ടലുകളുമായി ബന്ധമുണ്ടാകില്ലേ എന്നുള്ള ചോദ്യം പ്രസക്തമാണ്. ഗോൾഡൻ ഫോർക്ക് ഗ്രൂപ്പിലെ മാനേജിംഗ് പാർട്ണർ ഷാനവാസ് മുഹമ്മദ് പറയുന്നത് ഇപ്രകാരമാണ്-, “ഫുഡ് ഓർഡർ & ഡെലിവറി കമ്പനികൾ ധാരാളം മാർക്കറ്റിംഗ് നടത്തുന്നു, അത് മറ്റൊരു തലത്തിലാണ്. അതിനാൽ, ഇവരിൽ നിന്ന് ഉപഭോക്താക്കളെ ഞങ്ങളുടെ അടുത്തേക്ക് എത്തിക്കുക എന്നുള്ളതാണ് ഞങ്ങളുടെ പ്രാഥമിക ലക്ഷ്യം. ആത്യന്തികമായി, ഉപഭോക്താവിന് ഞങ്ങൾ മതിയായ മൂല്യം നൽകുന്നുണ്ടെങ്കിൽ അവർ ഞങ്ങളിൽ നിന്ന് ഓർഡർ ചെയ്യും. ” പക്ഷേ അതിനു കുറച്ച് സമയമെടുക്കും. അതുവരെ, എഫ് & ബി ബിസിനസുകൾ ഡെലിവറി ഓർഡറുകളെ പൂർണമായും ആശ്രയിച്ചിരിക്കുന്നു.
ഫുഡ് & ബിവറേജ് ബിസിനസുകൾ ഓൺലൈനായാൽ…
എഫ് & ബി ബിസിനസുകൾക്ക് അവരുടെ സ്വന്തം ആപ്ലിക്കേഷൻ സമാരംഭിക്കുന്നതോടു കൂടി നിലനിൽപ്പിനുള്ള പാത എളുപ്പമാക്കും, അത് സോമാറ്റോ, തലാബത്ത് എന്നിവരുമായി നേരിട്ട് മത്സരിക്കും. സ്വന്തം അപ്ലിക്കേഷനെ കുറിച്ച് അന്തിമ തീരുമാനം ഉടൻ എടുക്കുമെന്ന് റെസ്റ്റോറന്റ് വ്യവസായ വൃത്തങ്ങൾ പറയുന്നു. ആപ്ലിക്കേഷൻ ഉപയോഗിക്കുന്നതിനുള്ള ഉപഭോക്താവിന്റെ അന്തിമ നിരക്കുകൾ ഇപ്പോൾ ഫുഡ് പോർട്ടലുകൾ ചെയ്യുന്നതിനേക്കാൾ വളരെ കുറവായിരിക്കുമെന്നാണ് അവരുടെ വാഗ്ദാനം. എന്നാൽ ഇപ്പോൾ, എഫ് & ബി ബിസിനസുകൾ ആഗ്രഹിക്കുന്നത് അവരുടെ ഉപയോക്താക്കൾ നേരിട്ട് വിളിച്ച് ഓർഡർ നൽകുക എന്നതാണ്.
യുഎഇ യിൽ എഫ് & ബി ഇൻഡസ്ട്രി പുതിയ മുഖം കൈവരിക്കും-
വാഗമാമ ,ട്രേഡർ വിക്സ് മദീനത്ത് ജുമൈറ എന്നിവയുൾപ്പെടെയുള്ള 10 റെസ്റ്റോറന്റുകൾ നടത്തുന്ന ആർ‌എം‌എൽ ഹോസ്പിറ്റാലിറ്റി മാനേജിംഗ് ഡയറക്ടർ ഏലിയാസ് മദ്‌ബാക്കിന്റെ കുറിപ്പ്:
കോവിഡ് പ്രതിസന്ധിയിൽ റെസ്റ്റോറന്റുകൾ എല്ലാം ഇപ്പോൾ അതിജീവന അവസ്ഥയിലാണ്. ഏതൊരു സ്ഥാപനത്തിനും ഏറ്റവും ഉയർന്ന നിശ്ചിത വില വാടകയാണ്. പ്രതിസന്ധിക്ക് മുമ്പുതന്നെ, വിൽപ്പനയുടെ ശതമാനമെന്ന നിലയിൽ ദുബായിലെ വാടക ആഗോള നിരക്കിനേക്കാൾ കൂടുതലായിരുന്നു. ആയതിനാൽ അതിജീവനം ഉറപ്പാക്കാൻ വാടക ആശ്വാസം മാത്രം പോരാ. ഓരോ ബിസിനസ്സിനും വ്യത്യസ്ത സാഹചര്യങ്ങളുണ്ടെങ്കിലും വാടകയ്ക്ക് ആശ്വാസം ലഭിക്കാതെ അതിജീവനം സാധ്യമല്ലാത്തതിനാൽ മറ്റ് പല നടപടികളും കണക്കിലെടുക്കേണ്ടതുണ്ട്.
പരിമിതമായ ശേഷി ഉപയോഗിച്ച്, സാമൂഹിക അകലം പാലിക്കുന്നതുൾപ്പെടെയുള്ള മാർഗ്ഗനിർദ്ദേശങ്ങളും ഔട്ട്‌ലെറ്റുകൾ സുരക്ഷിതമായി സൂക്ഷിക്കുന്നതുമായി ബന്ധപ്പെട്ട വർദ്ധിച്ച ചെലവുകളും – അധിക ശുചിത്വം, കോൺടാക്റ്റ്ലെസ് മെനുകൾ, പേയ്‌മെന്റുകൾ എന്നിവ പോലുള്ളവയ്ക്കും – വാടക ആശ്വാസം ഒരു ആവശ്യകതയാണ്. എല്ലാ ബിസിനസുകളും ഭൂവുടമകളും ദുരിതമനുഭവിക്കുന്നു, പക്ഷേ മുന്നോട്ടുള്ള ഏറ്റവും നല്ല മാർഗം പൂർവ്വ സ്ഥിതി പ്രാപിക്കും വരെ വിറ്റുവരവു വഴി വാടക ഈടാക്കുക എന്നതാണ്. 2021 വരെ ഒരു മടക്കം ഞാൻ പ്രതീക്ഷിക്കുന്നില്ല. ഞങ്ങളുടെ ബിസിനസ്സിനെ സംബന്ധിച്ചിടത്തോളം, വാടകയ്ക്ക് ആശ്വാസം, സൗകര്യങ്ങൾ എന്നിവയാണ് ഏറ്റവും പെട്ടെന്നുള്ള രണ്ട് മുൻ‌ഗണനകൾ.
ഞങ്ങളുടെ വാടക എഴുതിത്തള്ളുകയോ വിറ്റുവരവിൽ വാടകയായി കുറയ്ക്കുകയോ ചെയ്യാൻ ഞങ്ങൾക്ക് കഴിയുന്നുണ്ടെങ്കിൽ, ബാങ്കുകൾ വഴി വായ്പകളിലൂടെയോ ഓവർ ഡ്രാഫ്റ്റ് സൗകര്യങ്ങളിലൂടെയോ സാമ്പത്തിക പരിഹാരം കാണാൻ ഞങ്ങൾക്ക് കഴിയുന്നുണ്ടെങ്കിൽ, ഈ അവസ്ഥയെ നേരിടാൻ കഴിഞ്ഞേക്കും. പിരിച്ചുവിടലുകളോ പൂർണ്ണമായ അടച്ചുപൂട്ടലുകളോ സാധ്യമല്ല. ഒരു സാഹചര്യത്തെത്തുടർന്ന് ഞങ്ങളുടെ വരുമാനം ഗണ്യമായ അളവിൽ കുറവായതിനാൽ, ഞങ്ങൾക്ക് വന്നു ചേർന്ന അധിക തൊഴിൽ ചെലവ് കുറയ്ക്കാനുള്ള വഴി ഞങ്ങൾ കണ്ടെത്തുന്നു. – ഇത് ശരിയായ ബിസിനസ്സ് തീരുമാനമാണ്. എന്നിരുന്നാലും, ഇത് ഒരു മാനുഷിക പ്രതിസന്ധിയാണ്. ഞങ്ങളുടെ ആദ്യത്തെ ശ്രമങ്ങളിലൊന്ന് ആരും ഈ ജോലിയിൽ നിന്ന് പിന്മാറില്ലെന്ന് ഉറപ്പാക്കലായിരുന്നു. ഞങ്ങളുടെ സ്റ്റാഫുകളെ കഴിയുന്നിടത്തോളം കാലം ഞങ്ങൾ നിലനിർത്തും. ഞങ്ങൾ ജനങ്ങളുമായുള്ള ബിസിനസ്സിലാണ്, ഇത് ചെയ്യേണ്ടത് ശരിയായ കാര്യമാണ്.
