വാഷിങ്ടൺ: നടപ്പു സാമ്പത്തിക വർഷം ഇന്ത്യക്ക് ഒട്ടും നല്ലതായിരിക്കില്ലെന്ന് ലോകബാങ്കിന്റെ മുന്നറിയിപ്പ്. 1991 ൽ സാമ്പത്തിക ഉദാരീകരണം നടപ്പാക്കിയ ശേഷമുള്ള ഏറ്റവും കുറഞ്ഞ വളർച്ചയാണ് കോവിഡ് രാജ്യത്ത് സൃഷ്ടിക്കാൻ പോകുന്നതെന്നും ബാങ്ക് വിലയിരുത്തുന്നു. 2020-21 ൽ 1.5 ശതമാനം മുതൽ 2.8 ശതമാനം വരെയാണ് കണക്കാക്കുന്ന വളർച്ച. കഴിഞ്ഞ മൂന്നു പതിറ്റാണ്ടിലെ ഏറ്റവും കുറഞ്ഞ നിരക്കാണിത്. വളർച്ച മുരടിച്ചു നിൽക്കുന്ന സമയത്താണ് കോവിഡ് വരുന്നത്. അതിനെ നേരിടാൻ സർക്കാർ ലോക്ക്ഡൗൺ പ്രഖ്യാപിച്ചതോടെ സർവമേഖലയും അടഞ്ഞു. അതോടെ ആഭ്യന്തര ഉൽപാദനവും ഡിമാൻറും ഇടിഞ്ഞു. ഇതാണ് വളർച്ച കുറയാൻ കാരണം.
